عید الاضحیٰ کی طویل تعطیلات سے قبل متحدہ عرب امارات کے نجی اسکولوں میں امتحانی تیاری تیز، طلبہ کو آرام اور خاندانی وقت دینے پر بھی زور

خلیج اردو
متحدہ عرب امارات میں عید الاضحیٰ کی متوقع طویل تعطیلات سے قبل نجی اسکولوں نے تعلیمی شیڈول ازسرنو ترتیب دیتے ہوئے طلبہ کی تیاری کو یقینی بنانے کیلئے نظرثانی کے عمل کو تیز کردیا ہے، جبکہ اہل خانہ کو پیشگی آگاہی بھی دی جارہی ہے۔

اطلاعات کے مطابق سن 2026 میں یوم عرفہ 26 مئی بروز منگل متوقع ہے، جس کے بعد عید الاضحیٰ کی تعطیلات 27 سے 29 مئی تک ہوسکتی ہیں۔ ہفتہ وار چھٹیوں کے ساتھ ملا کر یہ وقفہ چھ دن تک بڑھنے کا امکان ہے، تاہم حتمی اعلان حکام کی جانب سے کیا جائے گا۔

عجمان کے ایک نجی اسکول کی پرنسپل شائنی ڈیوسن نے کہا کہ طویل تعطیلات اساتذہ اور طلبہ دونوں کیلئے نہایت اہم ہیں۔ ان کے مطابق "اساتذہ نے مشکل تعلیمی دور میں غیر معمولی محنت کی، اب انہیں آرام اور توانائی بحال کرنے کا موقع ملنا چاہیے”۔

انہوں نے یقین دلایا کہ تعلیمی نصاب متاثر نہیں ہوگا کیونکہ اسکول پہلے ہی منصوبہ بندی کرچکا ہے۔ دوسری جانب طلبہ کو بھی ذہنی سکون، دوستوں سے ملاقات اور خاندانی وقت گزارنے کا موقع فراہم کیا جائے گا۔

ایک اور تعلیمی ادارے کی سربراہ لیزا جانسن نے بتایا کہ تعطیلات سے قبل والدین کو واضح شیڈول اور ہدایات فراہم کی گئی ہیں تاکہ وہ بہتر منصوبہ بندی کرسکیں۔ انہوں نے کہا کہ عید کے دوران طلبہ کو اضافی کام نہیں دیا جائے گا کیونکہ یہ وقت خاندان، عبادت اور خوشیوں کیلئے مخصوص ہونا چاہیے۔

امتحانات کی تیاری کرنے والے طلبہ کیلئے اسکولوں نے خصوصی نظرثانی پروگرام ترتیب دیے ہیں، جن میں ڈیجیٹل پلیٹ فارمز، رہنمائی اسائنمنٹس اور تعلیمی کمزوریوں کو دور کرنے کیلئے حکمت عملی شامل ہے۔

دبئی کے ایک اسکول کی پرنسپل چترا شرما نے کہا کہ عید خوشی، شکرگزاری اور یکجہتی کا موقع ہے، اور اسکول اس موقع کی ثقافتی اہمیت کو اجاگر کرنے کیلئے پرعزم ہیں، جبکہ سرکاری ہدایات کے مطابق والدین کو مسلسل آگاہ رکھا جائے گا۔

ماہرین کے مطابق یہ تعطیلات جہاں تعلیمی دباؤ میں کمی کا باعث بنیں گی، وہیں طلبہ کی ذہنی صحت اور خاندانی تعلقات کو مضبوط بنانے میں بھی مددگار ثابت ہوں گی۔