خلیج اردو
متحدہ عرب امارات میں پیر کے روز سیزن کی شدید ترین بارشوں میں سے ایک ریکارڈ کی گئی، جس کے باعث مختلف ریاستوں میں سڑکیں زیرِ آب آگئیں اور ٹریفک کی روانی متاثر ہوئی۔
نیشنل سینٹر آف میٹرولوجی کے مطابق سب سے زیادہ بارش المنامہ میں 93.3 ملی میٹر ریکارڈ ہوئی، جبکہ غیاثی میں 91 ملی میٹر، الوثبہ میں 88.2 ملی میٹر، محمد بن زاید سٹی میں 78.7 ملی میٹر اور الرویس میں 75.7 ملی میٹر بارش ریکارڈ کی گئی۔
ماہرین کے مطابق بارش کا یہ سلسلہ مغربی علاقے الظفرہ سے شروع ہو کر بتدریج ابوظہبی اور العین تک پھیل گیا، جبکہ دبئی کے علاقوں جبل علی اور البرشاء میں بھی بارش ہوئی۔
مزید برآں فجیرہ اور راس الخیمہ میں شام کے اوقات میں بارش میں اضافے کی توقع ظاہر کی گئی۔
محکمہ موسمیات نے خبردار کیا ہے کہ یہ موسمی نظام ایک ہی جگہ مسلسل بارش نہیں لائے گا بلکہ وقفے وقفے سے مختلف لہروں کی صورت میں بارش ہوتی رہے گی۔
ادارے کے مطابق 24 مارچ کو دوسری لہر، 25 مارچ کو شمالی و مشرقی علاقوں میں بارش جبکہ 26 اور 27 مارچ کی درمیانی شب آخری لہر متوقع ہے، جس کے بعد موسم بتدریج بہتر ہو جائے گا۔
حکام نے شہریوں کو ہدایت کی ہے کہ پانی جمع ہونے والی سڑکوں سے دور رہیں، محتاط ڈرائیونگ کریں اور غیر ضروری سفر سے گریز کریں۔
تجزیہ کاروں کے مطابق حالیہ بارشیں نہ صرف غیر معمولی موسمی تبدیلی کی عکاسی کرتی ہیں بلکہ شہری انفراسٹرکچر اور ہنگامی ردعمل کی صلاحیت کا بھی امتحان ہیں۔
