خلیج اردو
مدینہ منورہ: مسجد نبوی کے طویل عرصے تک خدمات انجام دینے والے معروف مؤذن شیخ فیصل بن عبد المالک النعمان پیر کی شام انتقال کر گئے۔ سعودی میڈیا کے مطابق وہ حالیہ دنوں میں صحت کی پیچیدگی کا شکار تھے، جس کے بعد ان کا انتقال ہوا۔
شیخ فیصل بن عبد المالک النعمان نے اپنی زندگی کے کئی عشرے مسجد نبوی میں اذان کی خدمت انجام دیتے ہوئے گزارے اور ان کی آواز دنیا بھر کے مسلمانوں کے لیے روحانی وابستگی اور عقیدت کی علامت بن چکی تھی۔ مسجد نبوی جیسے مقدس مقام پر اذان دینے کی سعادت نے انہیں امت مسلمہ میں ایک منفرد پہچان دی۔
ان کے انتقال سے نہ صرف مسجد نبوی بلکہ عالم اسلام میں سوگ کی فضا ہے، کیونکہ وہ اپنی سادہ مزاجی، اخلاص اور عبادت سے وابستہ زندگی کے باعث احترام کی نگاہ سے دیکھے جاتے تھے۔
