خلیج اردو
قاہرہ:مصر میں روایتی میٹھے تیار کرنے والی معروف ڈیسرٹ چین "بلابن” نے اعلان کیا ہے کہ ملک بھر میں اس کی تمام شاخیں بند کر دی گئی ہیں۔ کمپنی نے اسے ایک "غیر معمولی بحران” قرار دیتے ہوئے مصری صدر عبدالفتاح السیسی، کابینہ اور دیگر متعلقہ اداروں کو ایک کھلا خط بھی ارسال کیا ہے جس میں مکمل جانچ پڑتال کے لیے آمادگی ظاہر کی گئی ہے۔
کمپنی کے مطابق، "عرب جمہوریہ مصر میں بلابن کمپنی کی تمام سرگرمیاں مکمل طور پر معطل ہو چکی ہیں۔ ہماری 110 شاخیں، فیکٹریاں اور منسلک یونٹس بند کر دیے گئے ہیں، جن میں 25 ہزار مصری شہری ملازمت کر رہے تھے۔”
بیان میں مزید کہا گیا کہ "ہمیں اب تک ان اقدامات کی وجوہات یا ان کے حل کے طریقہ کار سے متعلق کوئی وضاحت فراہم نہیں کی گئی، جس کے باعث کمپنی اور اس کے ملازمین مکمل مفلوجی کا شکار ہو چکے ہیں۔”
کمپنی نے یہ بھی کہا کہ مصر میں اس کی سرگرمیوں کی معطلی نہ صرف مقامی مارکیٹ کو متاثر کرتی ہے بلکہ اس کے بین الاقوامی آپریشنز کو بھی فوری طور پر خطرے میں ڈالتی ہے، کیونکہ "تمام عرب ممالک میں ہماری سرگرمیاں مصر سے انتظام اور عملدرآمد پر منحصر ہیں۔”
بلابن مصر کے علاوہ سعودی عرب، متحدہ عرب امارات، مراکش، لیبیا، اردن، عمان اور قطر میں بھی کام کر رہی ہے۔
گزشتہ ماہ سعودی وزارت بلدیات و دیہی امور اور رہائش نے بلابن کی شاخوں کی عارضی بندش کا اعلان کیا تھا۔ یہ اعلان اس وقت سامنے آیا جب مختلف میڈیا اداروں اور سوشل میڈیا اکاؤنٹس نے رپورٹ کیا کہ بلابن کی مصنوعات سے وابستہ بڑی تعداد میں فوڈ پوائزننگ کے واقعات رپورٹ ہوئے ہیں۔
بلابن نے اپنے بیان میں کہا، "ہم واضح اور کھلے دل سے ہر قسم کی تفتیش، آڈٹ اور احتساب کے لیے مکمل طور پر تیار ہیں۔ ہم کسی بھی ریاستی کمیٹی، نگرانی کے ادارے یا قانونی عمل کو خوش آمدید کہتے ہیں۔”
کمپنی نے مزید کہا کہ وہ کوئی خصوصی رعایت یا احتساب سے استثنیٰ نہیں چاہتی بلکہ صرف "تحفظ، جانچ پڑتال اور انصاف” کی طلب گار ہے۔ بیان میں تسلیم کیا گیا کہ "ہم یہ دعویٰ نہیں کرتے کہ ہم سے کوئی غلطی نہیں ہوئی، اور ہم تسلیم کرتے ہیں کہ بڑے پیمانے پر کام کرنے والی کسی بھی کمپنی سے غلطیاں ہو سکتی ہیں۔ لیکن ہم ہمیشہ نظرثانی، اصلاح اور بہتری کے لیے تیار ہیں۔”
کمپنی نے صدر السیسی اور وزیراعظم مصطفیٰ مدبولی سے اپیل کی کہ وہ فوری مداخلت کرتے ہوئے اس قومی ادارے کو تحفظ فراہم کریں، جو اسی سرزمین پر پیدا ہوا، اپنے عوام کی خدمت کر رہا ہے اور بیرونِ ملک مصر کا نام فخر سے لے کر جا رہا ہے۔
یاد رہے، بلابن کی بنیاد 2021 میں اسکندریہ، مصر میں ایک چھوٹی سی فیکٹری کے طور پر رکھی گئی تھی جو روایتی مصری میٹھے جیسے چاول کی کھیر، کسکس، ام علی اور آئس کریم تیار کرتی تھی۔
