بھارت کی ایئرلائن انڈیگو کی بڑی مشکل، دبئی–بھارت پروازیں شدید متاثر

خلیج اردو
بھارتی ایئرلائن انڈیگو کی جانب سے ہزاروں پروازوں کی منسوخی اور تاخیر کے باعث دبئی سے بھارت سفر کرنے والے مسافروں کو شدید مشکلات کا سامنا کرنا پڑا ہے، بعض مسافروں نے دس دس گھنٹے تک طویل انتظار کیا۔ دبئی کے شہری محمد نے بتایا کہ ان کے بھائی کی 12:15 بجے دبئی سے ممبئی روانگی تھی لیکن پرواز تقریباً دس گھنٹے تاخیر کا شکار رہی اور رات 10 بجے روانہ ہوئی۔

متعدد پروازوں میں بدھ اور جمعرات کی رات تاخیر کے بعد جمعے کو بھی یہ سلسلہ جاری رہا۔ ایک اور مسافر ستیش نے بتایا کہ وہ اپنی شام 7 بجے کی ممبئی جانے والی پرواز کے لیے وقت سے پہلے پہنچے لیکن کئی بار وقت کی تبدیلی کے بعد پرواز منسوخ ہونے کا اعلان کر دیا گیا۔ مسافروں کو یا تو اگلی غیر یقینی پرواز کا انتظار کرنا تھا یا تین گنا زائد کرائے پر نئی ٹکٹ لینی تھی۔ کچھ مسافروں کو ویزا مسائل کا بھی سامنا کرنا پڑا۔

جمعے کے روز بھی دبئی سے انڈیگو کی مختلف پروازیں آٹھ سے دس گھنٹے تاخیر کا شکار رہیں، جن میں دبئی–کوزیکوڈ، دبئی–کوتچی اور دبئی–احمد آباد شامل ہیں۔

ایئرلائن نے اپنی وسیع پیمانے پر ہونے والی آپریشنل رکاوٹ پر عوام سے معذرت کرتے ہوئے کہا کہ گزشتہ دو روز میں پورے نیٹ ورک پر نمایاں خلل پڑا ہے۔ بھارت کی ڈائریکٹوریٹ جنرل آف سول ایوی ایشن (DGCA) نے پائلٹس کے لیے نئے ڈیوٹی ٹائم اصول نافذ کیے ہیں جس کے تحت ہفتہ وار 48 گھنٹے آرام لازمی قرار دیا گیا ہے اور رات کی لینڈنگز کی تعداد بھی کم کر دی گئی ہے۔ نئے قوانین کے نتیجے میں پائلٹس کی دستیابی کم ہوئی جس کے سبب سینکڑوں فلائٹس منسوخ ہوئیں۔

جمعے کے روز انڈیگو کی 500 سے زائد پروازیں منسوخ ہوئیں جبکہ بیک لاگ صاف کرنے میں کئی ہفتے لگنے کا امکان ظاہر کیا جا رہا ہے۔ بھارتی میڈیا کے مطابق DGCA نے جاری صورتحال کے پیش نظر عملے کی ہفتہ وار آرام کی شرط میں نرمی کے لیے نیا نوٹس بھی جاری کیا ہے۔