خلیج اردو
امریکہ میں بچوں کے فارمولا دودھ تیار کرنے والی کمپنی "بائی ہارٹ” نے اپنے پاؤڈر فارمولا دودھ کی کچھ کھیپیں واپس منگوا لی ہیں، کیونکہ اس کے استعمال سے 13 شیر خوار بچوں میں بوتولزم (Botulism) کی بیماری کی تصدیق ہوئی ہے۔
امریکی ادارے سینٹرز فار ڈیزیز کنٹرول (CDC) اور فوڈ اینڈ ڈرگ ایڈمنسٹریشن (FDA) نے دس ریاستوں میں اس مرض کے 13 کیسز کی تحقیقات شروع کر دی ہیں۔ تمام متاثرہ بچوں نے بائی ہارٹ برانڈ کا پاؤڈر فارمولا دودھ استعمال کیا تھا۔
سی ڈی سی کے مطابق بوتولزم ایک خطرناک بیماری ہے جو سانس لینے میں دشواری، پٹھوں کی کمزوری اور فالج جیسی علامات پیدا کر سکتی ہے، اور بعض اوقات طویل اسپتال میں داخلے کی ضرورت پڑتی ہے۔ اگرچہ یہ مرض جان لیوا بھی ثابت ہو سکتا ہے، لیکن اس کے علاج موجود ہیں۔ موجودہ واقعے میں کسی ہلاکت کی اطلاع نہیں ملی۔
بائی ہارٹ کی شریک بانی اور صدر میا فنٹ نے اپنے بیان میں کہا کہ "اگرچہ کمپنی یا کسی ریگولیٹری ادارے کے ٹیسٹ میں کلوسٹریڈیم بوٹولینم بیکٹیریا یا اس کے زہر کی تصدیق نہیں ہوئی، ہم احتیاطی طور پر یہ قدم اٹھا رہے ہیں تاکہ بچوں کی حفاظت کو یقینی بنایا جا سکے۔”
کمپنی کے مطابق بائی ہارٹ فارمولا دودھ "ماں کے دودھ سے قریب ترین پروٹین مرکب” پر مشتمل ہے اور "نامیاتی، گھاس کھانے والی گایوں کے دودھ” سے تیار کیا جاتا ہے۔
ایف ڈی اے اور سی ڈی سی کے ماہرین اب متاثرہ فارمولا کی باقیات کا تجزیہ کر رہے ہیں تاکہ آلودگی کے اصل منبع کا پتہ لگایا جا سکے۔ بائی ہارٹ کمپنی نے دو کھیپیں واپس منگوانے کا فیصلہ کیا ہے جن میں آلودگی کا شبہ ظاہر کیا گیا ہے۔
