کویت ایئر ویز کی فلائٹ معمولی حادثے کے باعث تاخیر کا شکار

خلیج اردو

کویت: جمعے کی صبح کویت انٹرنیشنل ایئرپورٹ پر فلپائن جانے والی کویت ایئر ویز کی فلائٹ ایک معمولی واقعے کے باعث تاخیر کا شکار ہوگئی۔ کویت نیوز ایجنسی (کونا) کے مطابق سول ایوی ایشن کے ڈائریکٹوریٹ جنرل نے بتایا کہ فلائٹ KU417 میں 284 مسافر سوار تھے اور حادثہ صبح 4 بج کر 24 منٹ پر اس وقت پیش آیا جب طیارہ روانگی کی تیاری میں تھا۔

سول ایوی ایشن اتھارٹی کے ترجمان عبداللہ الراشدی کے مطابق، واقعہ طیارے کے بریکنگ سسٹم میں اچانک تکنیکی خرابی کے باعث پیش آیا۔ حادثے سے کسی مسافر یا عملے کے رکن کو کوئی نقصان نہیں پہنچا، جبکہ نقصان صرف طیارے کے ڈھانچے تک محدود رہا۔

عبداللہ الراشدی نے واضح کیا کہ مسافروں اور عملے کی سلامتی سول ایوی ایشن اتھارٹی اور کویت ایئر ویز دونوں کی اولین ترجیح ہے، اور اس نوعیت کے واقعات بین الاقوامی ہوابازی کے حفاظتی معیارات کے مطابق نمٹائے جاتے ہیں۔

حادثے کے بعد تکنیکی ٹیموں نے فوری طور پر جائے وقوعہ کو محفوظ بنایا اور معائنہ مکمل کرنے کے بعد ایک متبادل طیارہ فراہم کیا گیا۔ پرواز دوپہر 12 بج کر 20 منٹ پر فلپائن کے لیے روانہ ہوئی۔