ابوظہبی: خلیج اردو
ابوظہبی پولیس نے خطرناک ٹریفک حادثات کی ویڈیو جاری کی ہے جن میں لاپرواہی اور غفلت برتنے والے ڈرائیورز نے سڑک کے کنارے کھڑی گاڑیوں کو ٹکر ماری۔ پولیس کے مطابق ان حادثات کی بڑی وجہ دورانِ ڈرائیونگ عدم توجہ اور غیر ضروری طور پر شانۂ سڑک پر گاڑی روکنا ہے۔
ابوظہبی پولیس نے عوام سے اپیل کی ہے کہ وہ کسی بھی صورت میں سڑک کے کنارے گاڑیاں نہ روکیں، اور ہنگامی صورتحال میں قریب ترین ایگزٹ تک جائیں۔ اگر گاڑی کو منتقل کرنا ممکن نہ ہو تو فوری طور پر 999 پر پولیس سے مدد حاصل کریں تاکہ سنگین حادثات سے بچا جا سکے۔
پولیس نے ہدایت دی کہ اگر گاڑی خراب ہو جائے تو ڈرائیور گاڑی کے اندر نہ رہیں بلکہ سڑک سے ہٹ کر محفوظ مقام پر چلے جائیں۔ حکام کے مطابق شانۂ سڑک پر بلا جواز گاڑی روکنے پر 500 درہم جرمانہ عائد کیا جائے گا، جب کہ سڑک کے درمیان گاڑی کھڑی کرنے پر ایک ہزار درہم جرمانہ اور 6 ٹریفک پوائنٹس لگائے جائیں گے۔
پولیس کا کہنا ہے کہ دورانِ ڈرائیونگ کسی بھی قسم کی توجہ کی کمی مہلک حادثات کا باعث بن سکتی ہے، اس لیے ڈرائیورز کو مکمل احتیاط سے گاڑی چلانے اور خطرناک صورتحال میں ہیزرڈ لائٹس استعمال کرنے کی ہدایت کی گئی ہے تاکہ سڑک پر تمام افراد کی حفاظت یقینی بنائی جا سکے۔
