خلیج اردو
14 نومبر 2025
جسٹس امین الدین خان نے بطور چیف جسٹس آئینی عدالت عہدے کا حلف اٹھا لیا ہے۔ صدر مملکت آصف علی زرداری نے ان سے حلف لیا۔
یہ تعیناتی 27ویں آئینی ترمیم کے تحت قائم کی گئی نئی آئینی عدالت کے قیام کے بعد ہوئی ہے، جو سپریم کورٹ کے آئینی بینچ کی جگہ لے گی۔ جسٹس امین الدین خان عدلیہ کے دیانتدار اور ممتاز جج کے طور پر جانے جاتے ہیں اور آئینی عدالت کے پہلے چیف جسٹس کے طور پر خدمات انجام دیں گے۔
جسٹس امین الدین خان 30 نومبر کو سپریم کورٹ سے ریٹائر ہونے والے تھے، تاہم آئینی عدالت کے چیف جسٹس کے عہدے پر تعیناتی کے بعد ان کے عہدے کی مدت میں توسیع ہو گی۔ قبل ازیں وہ چھبیسویں ترمیم کے تحت تشکیل دیے گئے آئینی بینچ کے سربراہ کے طور پر خدمات انجام دے چکے ہیں۔
جسٹس امین الدین خان یکم دسمبر 1960 کو ملتان میں پیدا ہوئے۔ انہوں نے ابتدائی تعلیم مقامی اسکول سے حاصل کی اور 1984 میں یونیورسٹی لاء کالج، ملتان سے ایل ایل بی مکمل کیا۔ 1985 میں بطور جونیئر وکیل پیشہ ورانہ زندگی کا آغاز کیا اور 1987 میں لاہور ہائی کورٹ کے وکیل کے طور پر انرول ہوئے۔ 2001 میں وہ سپریم کورٹ کے وکیل بنے۔
2011 میں انہیں لاہور ہائی کورٹ کے بینچ پر تعینات کیا گیا، جہاں انہوں نے دیوانی مقدمات میں مؤثر فیصلوں سے شہرت حاصل کی۔ 21 اکتوبر 2019 کو وہ سپریم کورٹ آف پاکستان میں ترقی پا گئے۔ ان کے نمایاں فیصلوں میں جولائی 12 کے ریزرو نشستوں کے مقدمے میں اختلافی نوٹ اور ذوالفقار علی بھٹو کے عدالتی قتل سے متعلق صدارتی ریفرنس کی سماعت شامل ہیں۔
