خلیج اردو
متحدہ عرب امارات میں ہونے والے ایک سروے کے مطابق ہر 9 میں سے ایک غیرملکی ملازم نے کہا ہے کہ وہ 2026 فیفا ورلڈ کپ میں اپنی قومی ٹیم کا میچ دیکھنے کے بعد بیماری کی چھٹی لینے کا ارادہ رکھتا ہے، جبکہ 34 فیصد ملازمین گھر سے کام (ورک فرام ہوم) کرنے کو ترجیح دیں گے۔
بھرتی کے ادارے رابرٹ والٹرز کے سروے کے مطابق، امریکا، کینیڈا اور میکسیکو میں جاری ورلڈ کپ کے باعث کئی میچ خلیجی وقت کے مطابق رات گئے یا علی الصبح کھیلے جا رہے ہیں، جس سے ملازمین کی نیند اور دفتری معمولات متاثر ہو رہے ہیں۔
سروے میں 37 فیصد پیشہ ور افراد نے کہا کہ اگر ورلڈ کپ کے دوران انہیں لچکدار اوقاتِ کار دیے جائیں تو ان کے اپنے ادارے کے بارے میں مثبت تاثر میں اضافہ ہوگا۔
دوسری جانب ہر پانچ میں سے دو آجر پہلے ہی اہم ورلڈ کپ میچز کے موقع پر ملازمین کو لچکدار اوقاتِ کار یا گھر سے کام کرنے کی اجازت دے چکے ہیں۔
رابرٹ والٹرز مشرقِ وسطیٰ کے منیجنگ ڈائریکٹر جیسن گرنڈی کے مطابق، عارضی طور پر ہائبرڈ ورکنگ یا دفتر آنے کے اوقات میں نرمی جیسے اقدامات ملازمین کی فلاح و بہبود، کام اور ذاتی زندگی کے درمیان توازن، اور اداروں کی مجموعی پیداواری صلاحیت برقرار رکھنے میں مددگار ثابت ہو سکتے ہیں۔
انہوں نے کہا کہ ایسے اقدامات صرف فٹبال شائقین ہی نہیں بلکہ دیگر ملازمین کے لیے بھی فائدہ مند ہوتے ہیں، کیونکہ اس سے دفتر کا ماحول بہتر ہوتا ہے اور ملازمین کی ادارے سے وابستگی میں بھی اضافہ ہوتا ہے۔
