مناسکِ حج کا سب سے اہم اور روحانی خطبہ، یوم عرفہ کا خطبہ شیخ صالح بن حمید دیں گے، سعودی حکومت کا اعلان

خلیج اردو
ریاض – مسجد الحرام اور مسجد نبویؐ کے امور کی صدارت نے اعلان کیا ہے کہ امسال حج کے دوران یوم عرفہ کا خطبہ معروف عالم دین اور مسجد الحرام کے امام و خطیب شیخ ڈاکٹر صالح بن عبداللہ بن حمید ارشاد فرمائیں گے۔

یوم عرفہ، جو ذوالحجہ کی 9 تاریخ کو ہوتا ہے، مناسکِ حج کا سب سے اہم اور روحانی نقطہ عروج سمجھا جاتا ہے۔ اس دن دنیا بھر کے مسلمان، خواہ وہ حج پر ہوں یا نہ ہوں، عبادت اور روزہ رکھتے ہیں۔

خطبۂ عرفہ مسجد نمرہ، جبل عرفات پر ظہر و عصر کی نماز سے قبل دیا جاتا ہے اور اسے دنیا بھر کے مسلمان براہِ راست سنتے ہیں۔

مسجد الحرام اور مسجد نبویؐ کے امور کے سربراہ شیخ عبدالرحمٰن السدیس نے شاہ سلمان بن عبدالعزیز اور ولی عہد شہزادہ محمد بن سلمان کا شکریہ ادا کیا کہ انہوں نے شیخ صالح بن حمید کو اس عظیم دینی ذمہ داری کے لیے منتخب کیا۔ ان کا کہنا تھا کہ اس فیصلے سے سعودی عرب کی مذہبی قیادت اور حرمین شریفین سے اس کی وابستگی کا اظہار ہوتا ہے۔