خلیج اردو
تہران:ایرانی وزارت خارجہ نے امریکہ کے ساتھ طے شدہ جوہری مذاکرات کی منسوخی کی تصدیق کر دی ہے۔ ترجمان وزارت خارجہ کے مطابق ایران نے فیصلہ کیا ہے کہ وہ اتوار کو ہونے والے مذاکرات میں شرکت نہیں کرے گا۔
ایرانی وزیر خارجہ عباس عراقچی نے کہا ہے کہ امریکہ کی جانب سے اسرائیل کی کھلی حمایت اور ایرانی علاقائی سالمیت کی خلاف ورزی نے ان مذاکرات کو "بے معنی” بنا دیا ہے۔ ان کے مطابق جو ملک ایک فسطائی حکومت کو ایرانی سرزمین پر حملے کی اجازت دے، اس کے ساتھ مذاکرات کا کوئی جواز باقی نہیں رہتا۔
عباس عراقچی کا کہنا تھا کہ امریکہ کی موجودہ پالیسی نے خطے میں کشیدگی کو بڑھا دیا ہے اور واشنگٹن کی اسرائیلی جارحیت پر خاموشی ایک سنگین عالمی خطرے کی علامت ہے۔ انہوں نے کہا کہ ایران اپنے قومی وقار، سالمیت اور خودمختاری پر کسی قسم کا سمجھوتہ نہیں کرے گا۔
ایرانی حکام نے واضح کیا ہے کہ جب تک امریکہ اپنی پالیسیوں پر نظرثانی نہیں کرتا، جوہری مذاکرات کی بحالی ممکن نہیں۔
