خلیج اردو
ابوظبی:متحدہ عرب امارات کے دارالحکومت ابوظبی میں واقع النور اسپتال، جو گزشتہ چار دہائیوں سے شہر کے وسط میں مریضوں کی خدمت کر رہا ہے، مستقل طور پر بند کیا جا رہا ہے۔ میڈکلینک گروپ نے اعلان کیا ہے کہ وہ النور اسپتال کو بند کر کے اپنی تمام خدمات کو ایئرپورٹ روڈ پر موجود جدید سہولیات والے اسپتال میں منتقل کر رہا ہے، جہاں 120 ملین درہم کی توسیعی منصوبے پر کام جاری ہے۔
یہ فیصلہ ابوظبی کے ایک نمایاں پرائیویٹ اسپتال کے دور کا اختتام ہے جو 1985 سے خدمات انجام دے رہا تھا۔ مقامی رہائشیوں نے اسپتال کی بندش کو "فطری سہولت اور جذباتی وابستگی” کے خاتمے سے تعبیر کیا۔
35 سالہ فلسطینی خاتون روان بطنجی، جو اسپتال کے قریب رہائش پذیر ہیں، نے کہا: "یہ افسوسناک ہے کہ ہر پرانی چیز بند ہوتی جا رہی ہے۔ میں نے کبھی نہیں سوچا تھا کہ النور اسپتال بھی چلا جائے گا، یہ ہمیشہ یہیں رہا ہے۔”
میڈکلینک مشرق وسطیٰ کے سی ای او ہین وین ایک نے بتایا کہ یہ فیصلہ اخراجات کم کرنے کے لیے نہیں بلکہ مریضوں کو بہتر، مرکزی اور جدید سہولیات کی فراہمی کے لیے کیا گیا ہے۔ ان کے مطابق، ایئرپورٹ روڈ کی توسیع میں ماں اور بچے کی نگہداشت، کینسر کا علاج، اور پیچیدہ سرجری جیسے خصوصی شعبے شامل کیے جا رہے ہیں۔
علاقہ مکینوں کا ردعمل
69 سالہ شامی خاتون شاديہ ابو الفرج نے بتایا کہ "جب ہم 1996 میں ابوظبی آئے تو ہمیں حیرت ہوئی کہ اتنے مصروف علاقے میں ایک اسپتال موجود ہے، لیکن یہاں کے ڈاکٹرز بہترین تھے۔” انہوں نے مزید کہا کہ وہ اب بھی النور کو ترجیح دیتی ہیں، حالانکہ وہ ایئرپورٹ روڈ کے قریب رہتی ہیں۔
منتقلی اور ملازمین کا تحفظ
سی ای او نے واضح کیا کہ تقریباً دو تہائی عملے کو یا تو ایئرپورٹ روڈ کی نئی سہولت یا ابوظبی کی دیگر میڈکلینک شاخوں میں منتقل کر دیا جائے گا۔ انہوں نے کہا کہ متاثرہ عملے کے لیے مالی امدادی پیکجز، ملازمت کی تلاش میں مدد، سی وی اور لنکڈ اِن پروفائل کی تیاری جیسی سہولیات بھی فراہم کی جا رہی ہیں۔
یہ بھی انکشاف کیا گیا کہ غیر طبی عملے جیسے سیکیورٹی، ویلیٹ اور کیٹرنگ کے اسٹاف کے لیے بھی کنٹریکٹرز سے بات چیت کی جا رہی ہے تاکہ انہیں بھی کسی نقصان کے بغیر دوسرے مقامات پر ایڈجسٹ کیا جا سکے۔
مریضوں کے لیے سہولت
میڈکلینک نے وعدہ کیا ہے کہ شہر کے وسط سے آنے والے مریضوں کے لیے ٹرانسپورٹ سپورٹ فراہم کی جائے گی تاکہ منتقلی کا عمل آسان بنایا جا سکے۔ مزید برآں، جن مریضوں کے انشورنس پلان ایئرپورٹ روڈ برانچ میں قبول نہیں، ان کے لیے متبادل اداروں میں ریفرل دیا جائے گا تاکہ علاج میں تعطل نہ آئے۔
فی الحال منتقلی کا عمل آئندہ ہفتے سے مرحلہ وار شروع ہوگا۔ میڈکلینک کی میڈیکل ٹیموں نے پہلے ہی دونوں برانچز میں مشترکہ کام شروع کر دیا ہے تاکہ منتقلی آسانی سے مکمل ہو سکے۔
