عمان میں میلاد النبی ﷺ پر سرکاری و نجی شعبے کے لیے عام تعطیل کا اعلان

خلیج اردو
مسقط: سلطنت عمان میں حکام نے اتوار، 7 ستمبر کو میلاد النبی ﷺ کے موقع پر سرکاری اور نجی شعبوں کے ملازمین کے لیے عام تعطیل کا اعلان کر دیا۔

قبل ازیں عمان نے 23 اگست کی شام چاند نظر نہ آنے کی تصدیق کی تھی جس کے بعد ربیع الاول کا مہینہ 25 اگست سے شروع ہوا۔ اسلامی مہینے 29 یا 30 دن پر مشتمل ہوتے ہیں اور نئے مہینے کا آغاز چاند دیکھنے پر ہوتا ہے۔

ربیع الاول کی 12 تاریخ کو میلاد النبی ﷺ منایا جاتا ہے۔ اس سال یہ دن 5 ستمبر کو بروز جمعہ آ رہا ہے، جو عمان میں ہفتہ وار چھٹی کا دن ہے۔ اس لیے حکام نے اعلان کیا کہ اس مناسبت سے اتوار 7 ستمبر کو چھٹی دی جائے گی تاکہ ملازمین کو تین دن کا طویل ویک اینڈ مل سکے۔

عمان میں سرکاری ہفتہ اتوار سے جمعرات تک ہوتا ہے، اس لیے جمعہ کو آنے والی تعطیل کو آگے بڑھا کر اتوار کو دینا ملازمین کے لیے زیادہ فائدہ مند ثابت ہوگا۔

دوسری جانب متحدہ عرب امارات میں بھی میلاد النبی ﷺ پر جمعہ، 5 ستمبر کو نجی و سرکاری شعبے کے لیے تنخواہ سمیت چھٹی کا اعلان کیا گیا ہے۔ اس طرح یو اے ای میں بھی زیادہ تر ملازمین کو ہفتہ اور اتوار کے ساتھ تین دن کا ویک اینڈ میسر ہوگا۔