بین الاقوامی پروازوں پر پابندی اٹھانے کی تجویز کا جائزہ

خلیج اردو –  سعودی وزارت صحت کے ترجمان ڈاکٹر محمد العبد العالی نے کہا ہے کہ متعلقہ اداروں کے ماہرین سفری پابندیاں اٹھانے کی تجویز کا جائزہ لے رہے ہیں۔ مناسب وقت پر آمد و رفت کے لیے پروازیں بحال کردی جائیں گی

ترجمان نے جواب میں بتایا کہ متعلقہ ادارے، اعلی عہدیداران اور ماہرین سفر سمیت تمام باقی ماندہ پابندیاں اٹھانے کی تجویز کا گہرائی سے جائزہ لے رہے ہیں۔ مناسب وقت پر پابندیاں اٹھالی جائیں گی

انہوں نے مزید کہا کہ مملکت میں کورونا کے ایکٹیو کیسز کم ہوگئے ہیں اس وقت ان کی تعداد  21284 ہے جبکہ نازک کیسز کی تعداد 1545 ہے اس سے ظاہر ہورہا ہے کہ صورتحال مسلسل بہتر ہورہی ہے

وزارت صحت کے ترجمان کا کہنا تھا کہ سائنٹفک بنیادوں اور ماہرین کی سفارشات پر مختلف سرگرمیوں پر عائد پابندیاں اٹھالی گئی ہیں تاہم ایس او پیز کی پابندی کی تاکید کی جارہی ہے۔ اب ملک میں موثر شکل میں وبا کے پھیلنے یا وائرس لگنے والے مراکز محدود ہوگئے ہیں۔

اخبار 24 کے مطابق العبد العالی نے کہا کہ جن سرگرمیوں پر عائد پابندیاں اٹھائی گئی ہیں ان کی بابت ماہرین نے ایس او پیز کی پابندی کے ساتھ پابندی اٹھانے کی سفارش کی تھی۔ باقی ماندہ سرگرمیوں کی بابت بھی مناسب وقت پر فیصلہ کرلیا جائے گا۔