خلیج اردو آن لائن : سعودی عرب میں اکثر اوقات اسمگلنگ کی کوششیں ناکام بنا دی جاتی ہیں۔ تاہم سعودی سیکیورٹی اہلکاروں کےسوچ میں بھی نہ تھا کہ انہیں خواتین اسمگلرو ں سے واسطہ پڑ جائے گا، جو بڑی ہمت اور دلیری سے کئی سو کلوگرام چرس ٹرک میں اسمگل کرنے کا سوچ بھی سکتی ہیں۔ گلف نیوز کے مطابق سعودی پولیس نے دو سعودی خواتین سمگلرز کو ان کے ساتھی ٹرک ڈرائیور سمیت گرفتار کر لیا ہے۔
یہ خواتین ایک ٹرک میں 224 کلوگرام چرس لے جا رہی تھیں جو انہوں نے گھاس پھوس کے ڈھیر میں چھُپا رکھی تھی۔ جازان کے سرحدی علاقے کی ایک سیکیورٹی چیک پوسٹ پر جب اس ٹرک کو روکا گیا تو تلاشی لینے پر سینکڑوں کلو چرس دیکھ کر سیکیورٹی اہلکار بھی حیران ہو گئے۔
وزارت داخلہ کے سیکیورٹی افیئرز کے ترجمان کرنل احمد التعاون نے بتایا کہ دونوں لیڈی اسمگلرز اور ان کے ساتھی ٹرک ڈرائیور کو گرفتار کر لیا گیا ہے۔
تینوں سمگلرز سعودی شہری ہیں۔ یہ گزشتہ چند ہفتوں کے دوران سعودی عرب میں پکڑی جانے والی منشیات کی بڑی مقدار ہے۔ گزشتہ ہفتے بھی کسٹم حکام نے سعودی میں اسمگلنگ کی کھیپ پکڑ لی تھی۔ جب کارگو کے سامان میں خربوزوں میں بڑی مہارت سے چھُپائی گئی نشہ آور کیپٹاگون کی لاکھوں گولیاں برآمد ہوئی تھیں۔ پولیس حکام کے مطابق ان نشہ آور گولیوں کی کُل تعداد 5 لاکھ 70 ہزار تھی۔
یہ منشیات سعودی عرب اور اُردن کی سرحد الحدیثہ میں تلاشی کے دوران ضبط کی گئی۔ واضح رہے کہ سعودی عرب میں منشیات کی اسمگلنگ انتہائی سخت جُرم تصور کیا جاتا ہے۔ اسمگلنگ میں ملوث افراد کو سزائے موت دی جاتی ہے۔ گزشتہ دو برس کے دوران درجنوں پاکستانیوں کو بھی سعودی عرب منشیات اسمگلنگ کا قصوروار ٹھہرا کر ان کے سر قلم کر دیئے گئے ہیں۔
