خلیج اردو
وزیراعظم پاکستان شہباز شریف نے پاکستان اور بحرین کے درمیان تجارت کو موجودہ 55 کروڑ ڈالر سے بڑھا کر ایک ارب ڈالر تک لے جانے کا ہدف مقرر کر دیا ہے۔ یہ اعلان انہوں نے منامہ کے سرکاری دورے کے دوران بحرین کے ولی عہد شہزادہ سلمان بن حماد آل خلیفہ سے تفصیلی ملاقات میں کیا۔
وزیراعظم ہاؤس کے مطابق شہباز شریف نے کہا کہ یہ ہدف پاکستان اور جی سی سی کے درمیان فری ٹریڈ معاہدے کی تکمیل اور ویزہ سہولتوں میں نرمی کے بعد ممکن ہو سکے گا، جس سے تجارت، کاروباری روابط اور سرمایہ کاری میں تیزی آنے کی توقع ہے۔ دونوں رہنماؤں نے اعلیٰ تعلیم، ٹیکنیکل تربیت اور ڈیجیٹل گورننس میں جاری تعاون کا جائزہ لیا، جبکہ شہباز شریف نے اسلام آباد میں کنگ حمد یونیورسٹی برائے نرسنگ اینڈ الائیڈ میڈیکل سائنسز کی تعمیر میں بحرین کے کردار کو سراہا۔ انہوں نے حالیہ مہینوں میں پاکستانی شہریوں کی رہائی اور وطن واپسی میں تعاون پر بحرینی حکام کا شکریہ بھی ادا کیا۔
دفاعی پیداوار کے حوالے سے دونوں ممالک نے دفاعی تربیت، سائبر سیکیورٹی، لاجسٹکس، دفاعی سازوسامان اور معلومات کے تبادلے میں مزید توسیع پر اتفاق کیا۔ ملاقات میں خطے کی صورتحال، بالخصوص غزہ کی صورتحال پر بھی گفتگو ہوئی، جہاں دونوں رہنماؤں نے کہا کہ وہاں کے لوگوں کے لیے امن اور استحکام ایک دیرینہ ضرورت ہے۔
بعد ازاں بحرین کے بادشاہ ہماد بن عیسیٰ آل خلیفہ نے وزیراعظم شہباز شریف کا استقبال کیا اور دونوں ممالک کے تاریخی اور مضبوط تعلقات کی اہمیت کو اجاگر کیا۔ شہباز شریف نے بحرین کی مہمان نوازی، پاکستان کے لیے خیرسگالی اور خطے میں امن و رواداری کے فروغ میں بادشاہ کے کردار کو سراہا۔ اس موقع پر بحرین کے بادشاہ نے وزیراعظم شہباز شریف کو ملک کا اعلیٰ ترین اعزاز، آرڈر آف بحرین (فسٹ کلاس)، بھی عطا کیا۔
ملاقات میں سیاسی، معاشی، دفاعی اور ثقافتی تعاون میں پیش رفت کا جائزہ لیا گیا اور مشترکہ مفادات، باہمی اعتماد اور قریبی تعاون کی بنیاد پر تعلقات کو مزید مضبوط بنانے پر اتفاق کیا گیا۔ وزیراعظم نے پاکستان میں حالیہ دہشت گردی کے واقعات پر بحرین کی یکجہتی پر بھی شکریہ ادا کیا۔
دونوں ممالک نے اس امید کا اظہار کیا کہ یہ دورہ باہمی تعلقات کو نئی وسعت دے گا اور اقتصادی و تزویراتی شراکت داری کو مزید تقویت پہنچائے گا۔ بحرین کے بادشاہ نے آخر میں پاکستانی وفد کے اعزاز میں خصوصی عشائیہ بھی دیا۔
