خلیج اردو
ملتان:: پاکستان سپر لیگ کے 12ویں میچ میں ملتان سلطانز نے بہترین کھیل کا مظاہرہ کرتے ہوئے لاہور قلندرز کو 33 رنز سے شکست دے دی۔ اس کامیابی کے ساتھ ملتان سلطانز نے ایک اہم جیت اپنے نام کی۔
ملتان سلطانز نے پہلے بیٹنگ کرتے ہوئے 20 اوورز میں 228 رنز بنائے اور صرف 5 کھلاڑی آؤٹ ہوئے۔ یاسر خان نے شاندار 87 رنز (44 گیندوں پر) کی اننگز کھیلی، جبکہ افتخار احمد نے 18 گیندوں پر 40 رنز کی برق رفتار اننگز کھیل کر ٹیم کو بڑے اسکور تک پہنچایا۔ عثمان خان نے بھی 39 رنز کا حصہ ڈالا۔
لاہور قلندرز کی جانب سے رشاد حسین نے 4 اوورز میں 45 رنز دے کر 2 وکٹیں حاصل کیں۔ سکندر رضا نے صرف 2 اوورز میں 15 رنز دے کر ایک کھلاڑی آؤٹ کیا جبکہ آصف آفریدی نے بھی ایک وکٹ حاصل کی۔
جواب میں لاہور قلندرز کی ٹیم 20 اوورز میں 195 رنز بنا سکی اور 9 کھلاڑی آؤٹ ہوئے۔ ملتان کی شاندار بولنگ نے لاہور کی بیٹنگ لائن کو دباؤ میں رکھا اور فتح کو یقینی بنایا۔
