خلیج اردو
صدرِ مملکت آصف علی زرداری نے متحدہ عرب امارات کے صدر شیخ محمد بن زاید النہیان سے ابوظہبی میں ملاقات کی۔
ملاقات میں دونوں رہنماؤں نے پاکستان اور یو اے ای کے درمیان دیرینہ اور برادرانہ تعلقات کو مزید مضبوط بنانے پر اتفاق کیا۔
صدر آصف علی زرداری اور شیخ محمد بن زاید النہیان نے دوطرفہ تعاون کے تمام پہلوؤں کا جائزہ لیا اور تعلقات کو نئی بلندیوں تک لے جانے کے طریقوں پر تبادلۂ خیال کیا۔
دونوں رہنماؤں نے تجارت، سرمایہ کاری، توانائی، انفراسٹرکچر، ٹیکنالوجی اور عوامی روابط سمیت مختلف شعبوں میں نئے مواقع تلاش کرنے پر زور دیا۔
ملاقات میں اقتصادی اور تزویراتی شراکت داری کو مزید وسعت دینے کی نمایاں صلاحیت کو اجاگر کیا گیا۔
صدرِ مملکت نے متحدہ عرب امارات کے صدر کے حالیہ دورۂ پاکستان کی اہمیت پر روشنی ڈالی اور کہا کہ اس دورے سے دوطرفہ تعلقات کو نئی جہت ملی ہے۔
دونوں فریقین نے علاقائی اور بین الاقوامی پیش رفت پر بھی تبادلۂ خیال کیا اور امن، استحکام اور پائیدار ترقی کے فروغ کے عزم کا اعادہ کیا۔
ملاقات میں خاتونِ اول آصفہ بھٹو زرداری، رکنِ قومی اسمبلی اور چیئرمین پیپلز پارٹی بلاول بھٹو زرداری بھی شریک تھے۔
وفاقی وزیرِ داخلہ و انسدادِ منشیات محسن نقوی اور متحدہ عرب امارات میں پاکستان کے سفیر نے بھی ملاقات میں شرکت کی۔
