وزیر اعظم شہباز شریف نے 27ویں آئینی ترمیم سے وزیراعظم کو استثنیٰ دینے کی شق واپس لینے کا حکم دے دیا

خلیج اردو

اسلام آباد: وزیر اعظم شہباز شریف نے 27ویں آئینی ترمیم میں وزیراعظم کو استثنیٰ دینے کی مجوزہ شق فوری طور پر واپس لینے کا حکم دے دیا۔ انہوں نے کہا کہ ایک منتخب وزیر اعظم کو قانون اور عوام دونوں کے سامنے مکمل طور پر جوابدہ ہونا چاہیے۔

شہباز شریف نے ایک بیان میں کہا کہ ’’اگرچہ میں ان کی نیک نیتی کو تسلیم کرتا ہوں، تاہم یہ تجویز کابینہ سے منظور شدہ مسودے کا حصہ نہیں تھی۔ میں نے اسے فوری طور پر واپس لینے کی ہدایت کر دی ہے۔‘‘

وزیر اعظم نے ایکس پر اپنے بیان میں کہا کہ آذربائیجان کے دورے سے واپسی پر انہیں معلوم ہوا کہ پارٹی سے تعلق رکھنے والے بعض سینیٹرز نے 27ویں آئینی ترمیم میں وزیر اعظم کو استثنیٰ دینے سے متعلق ترمیم جمع کرائی ہے۔

انہوں نے واضح کیا کہ کسی بھی جمہوری اصول کے تحت وزیراعظم کو استثنیٰ نہیں بلکہ احتساب کے عمل سے گزرنا چاہیے۔ یہ بیان ایسے وقت میں سامنے آیا ہے جب سینیٹ اور قومی اسمبلی کی کمیٹیاں 27ویں آئینی ترمیم کے مجوزہ بل پر مشاورت کا سلسلہ جاری رکھے ہوئے ہیں۔