"بھارت کی بی ٹیم بھی پاکستان کو ہرا سکتی ہے”— سنیل گواسکر کے بیان پر جیسن گلیسپی کا سخت ردعمل

خلیج اردو
دبئی:سابق آسٹریلوی فاسٹ بولر اور پاکستان ٹیسٹ ٹیم کے سابق ہیڈ کوچ جیسن گلیسپی نے بھارتی کرکٹ لیجنڈ سنیل گواسکر کے اس بیان کو سختی سے مسترد کر دیا ہے، جس میں گواسکر نے کہا تھا کہ بھارت کی بی ٹیم بھی موجودہ پاکستانی ٹیم کو شکست دے سکتی ہے۔

یہ بیان بھارت کی پاکستان کے خلاف آئی سی سی چیمپئنز ٹرافی 2025 کے گروپ اے کے میچ میں شاندار فتح کے بعد دیا گیا۔ دبئی میں کھیلے گئے اس میچ میں ویرات کوہلی نے ناقابلِ شکست سنچری اسکور کی، جس کی بدولت روہت شرما کی قیادت میں بھارتی ٹیم نے محمد رضوان کی قیادت میں کھیلنے والی پاکستان ٹیم کو چھ وکٹوں سے شکست دے دی۔

اس جیت کے بعد سنیل گواسکر نے ایک انٹرویو میں کہا کہ میرے خیال میں بھارت کی بی ٹیم یقینی طور پر پاکستان کے لیے سخت حریف ثابت ہو سکتی ہے۔ سی ٹیم کے بارے میں یقین سے نہیں کہہ سکتا، لیکن بی ٹیم پاکستان کو ہرانے کی بھرپور صلاحیت رکھتی ہے۔

جیسن گلیسپی نے گواسکر کے بیان پر شدید ردعمل دیتے ہوئے اسے بکواس قرار دیا۔ انہوں نے کہا کہ میں اس بیان سے بالکل متفق نہیں ہوں۔ میں نے سنیل گواسکر کا یہ تبصرہ سنا کہ بھارت کی بی یا سی ٹیم بھی پاکستان کو ہرا سکتی ہے، یہ سراسر غلط ہے۔

انہوں نے مزید کہا کہ اگر پاکستان صحیح کھلاڑیوں کا انتخاب کرے، ان پر بھروسہ کرے اور انہیں کھیلنے کا مکمل موقع دے، تو یہ ٹیم کسی کو بھی شکست دینے کی صلاحیت رکھتی ہے۔ اس میں کوئی شک نہیں۔

گلیسپی، جو پاکستان کی کوچنگ سے استعفیٰ دے چکے ہیں، نے پاکستانی ٹیم کے غیر مستحکم انتخابی پالیسیوں پر بھی تنقید کی۔ انہوں نے کہا کہ پاکستان کرکٹ میں بہت زیادہ بے صبری پائی جاتی ہے۔ اگر پی سی بی واقعی کارکردگی کو بہتر بنانا چاہتا ہے تو اسے صحیح لوگوں کا انتخاب کر کے انہیں وقت دینا ہوگا۔ بار بار تبدیلیاں کرنے سے نتائج بہتر نہیں ہوں گے۔

پاکستان چیمپئنز ٹرافی کے سیمی فائنل میں جگہ بنانے میں ناکام رہا اور گروپ اے میں سب سے نیچے رہا۔ پاکستان کو بھارت اور نیوزی لینڈ کے خلاف شکست کا سامنا کرنا پڑا، جبکہ بنگلہ دیش کے خلاف راولپنڈی میں ہونے والا میچ بارش کی نذر ہو گیا۔

اب پاکستان کرکٹ ٹیم نیوزی لینڈ کے خلاف وائٹ بال سیریز کی تیاری کر رہی ہے، جبکہ بھارت چیمپئنز ٹرافی کے فائنل میں نیوزی لینڈ سے نو مارچ کو دبئی میں ٹکرائے گا۔