ابوظہبی: ابوظہبی پبلک ہیلتھ سینٹر نے محکمہ صحت ابوظہبی کے تعاون سے 2025–2026 کی سالانہ موسمی انفلوئنزا ویکسینیشن مہم کے تحت نمایاں پیشرفت حاصل کر لی ہے، جہاں مہم کے آغاز سے اب تک 3 لاکھ 50 ہزار سے زائد افراد کو فلو ویکسین لگائی جا چکی ہے۔ یہ حالیہ برسوں میں امارت میں ویکسینیشن کی سب سے بلند شرح ہے۔
ستمبر 2025 سے مارچ 2026 تک جاری رہنے والی یہ مہم ابوظہبی کی احتیاطی صحت حکمتِ عملی کا حصہ ہے، جس کا مقصد انفیکشن کی شرح میں کمی، زیادہ خطرے سے دوچار افراد کا تحفظ اور فلو کے موسم میں کمیونٹی امیونٹی کو مضبوط بنانا ہے۔
گزشتہ چند برسوں میں ویکسین لگوانے والوں کی تعداد میں نمایاں اضافہ ہوا ہے۔ 2022–2023 کے سیزن میں یہ تعداد 1 لاکھ 62 ہزار 761 تھی، جو موجودہ سیزن میں بڑھ کر 3 لاکھ 50 ہزار سے تجاوز کر گئی، یعنی 115 فیصد سے زیادہ اضافہ ریکارڈ کیا گیا۔
ویکسین تک آسان رسائی کے لیے مہم کے تحت مختلف مقامات کو شامل کیا گیا ہے، جن میں مجالس، شاپنگ مالز، دفاتر، لیبر رہائش گاہیں، سرکاری ادارے، سفارت خانے اور ثقافتی مراکز شامل ہیں۔ ابوظہبی، العین اور الظفرہ کے شاپنگ مالز میں ہفتہ وار جبکہ مجالس میں روزانہ کی بنیاد پر آگاہی اور ویکسینیشن سرگرمیاں جاری ہیں۔
مہم میں ان طبقات کو ترجیح دی گئی ہے جو فلو کی پیچیدگیوں کے زیادہ خطرے میں ہوتے ہیں، جن میں بزرگ شہری، حاملہ خواتین، بچے، دائمی امراض میں مبتلا افراد، رہائشی اور فرنٹ لائن ورکرز شامل ہیں۔
صحت کے حکام نے ذاتی احتیاطی تدابیر کی اہمیت پر بھی زور دیا ہے، جن میں باقاعدہ ہاتھ دھونا، کھانستے یا چھینکتے وقت منہ اور ناک ڈھانپنا، بیمار افراد سے قریبی رابطے سے گریز اور علامات کی صورت میں گھر پر رہنا شامل ہے۔ طبی شواہد کے مطابق ویکسینیشن کے ساتھ صحت مند روزمرہ عادات اپنانا وائرس کے پھیلاؤ کو مؤثر طریقے سے کم کرتا ہے۔
ہیلتھ سرویلنس ڈیٹا کے مطابق سیزن کے آغاز سے اب تک انفلوئنزا کی پیچیدگیوں کے باعث اسپتال میں داخل ہونے والے زیادہ تر افراد غیر ویکسین شدہ تھے، خاص طور پر بزرگ، دائمی امراض کے مریض اور بچے۔ یہ عالمی شواہد سے بھی مطابقت رکھتا ہے کہ سالانہ ویکسینیشن بیماری کی شدت اور پیچیدگیوں میں کمی کا مؤثر ذریعہ ہے۔
ابوظہبی پبلک ہیلتھ سینٹر کے ڈائریکٹر جنرل ڈاکٹر راشد السویدی نے کہا کہ اس سیزن میں 3 لاکھ 50 ہزار سے زائد ویکسینیشنز کمیونٹی میں احتیاطی صحت کے حوالے سے بڑھتی ہوئی آگاہی اور ذمہ داری کا واضح ثبوت ہیں۔ ان کا کہنا تھا کہ مہم کے ذریعے ہر سطح پر ویکسین کی دستیابی یقینی بنائی گئی ہے تاکہ رہائشیوں کا تحفظ کیا جا سکے اور صحت کے نظام کی مجموعی تیاری کو مضبوط بنایا جا سکے۔
انہوں نے تمام افراد پر زور دیا کہ وہ خود بھی ویکسین لگوائیں اور دوسروں کو بھی محفوظ بنانے میں اپنا کردار ادا کریں۔
موسمی انفلوئنزا دنیا بھر میں پھیلنے والی عام وائرل بیماریوں میں شامل ہے، جس سے بچاؤ کے لیے سالانہ ویکسینیشن کو سب سے مؤثر طریقہ تسلیم کیا جاتا ہے۔ ابوظہبی میں بین الاقوامی صحت سفارشات کے مطابق اپ ڈیٹ شدہ ویکسین فراہم کی جا رہی ہے۔
ابوظہبی پبلک ہیلتھ سینٹر نے عوام سے اپیل کی ہے کہ وہ منظور شدہ بنیادی صحت مراکز یا کمیونٹی ویکسینیشن پوائنٹس کے ذریعے موسمی فلو کی ویکسین حاصل کریں۔
