دبئی کی سنسنی خیز وارداتیں: کروڑوں کے ہیروں سے لے کر فلمی انداز کے ڈاکے تک کے حیران کن انکشافات

خلیج اردو
دبئی: دبئی اپنی چمکتی اسکائی لائن اور لگژری لائف اسٹائل کے لیے مشہور ہے، مگر اس کے ساتھ ہی یہاں ایسی وارداتیں بھی ہوئیں جو کسی ہالی ووڈ فلم کی کہانی سے کم نہیں لگتیں۔ ان میں کروڑوں ڈالر مالیت کے ہیروں کی چوریاں، اسلحے کے زور پر ڈاکے اور پولیس کی بجلی کی رفتار سے کارروائیاں شامل ہیں جنہوں نے دنیا بھر کی توجہ اپنی جانب مبذول کرائی۔

١۔ وافی سنٹر جیولری ڈکیتی – 2007 (15 ملین ڈالر):
اپریل 2007 میں مشہور انٹرنیشنل گینگ پنک پینتھرز نے دبئی کے وافی مال میں گاڑیاں شیشے کی دیواروں سے توڑ کر ایک مشہور زیورات کی دکان سے ایک منٹ سے بھی کم وقت میں 55 ملین درہم کے زیورات لوٹ لیے۔ بعد ازاں دبئی پولیس کی فارنزک ٹیم نے ڈی این اے کے ذریعے اس گینگ کو انٹرپول کے ریڈار پر لایا۔ یہ گروہ دنیا کے 20 ممالک میں 120 سے زائد اسٹور لوٹ چکا تھا۔ کئی ارکان بعد میں یورپ میں گرفتار ہوئے اور ایک مرکزی ملزم کو جرمنی سے دبئی لا کر دس سال قید کی سزا سنائی گئی۔

٢۔ رقم لے جانے والی گاڑی پر ڈکیتی – 2017 (3.8 ملین ڈالر):
سال 2017 میں ایک نو رکنی گینگ نے دبئی کے المرقدبات علاقے میں اے ٹی ایم میں رقم ڈالنے والی کیش وین کو نشانہ بنایا۔ صرف بارہ گھنٹوں میں دبئی پولیس نے تمام ملزمان کو گرفتار کر کے 14 ملین درہم برآمد کر لیے۔ اسی واردات کے بعد متحدہ عرب امارات میں نئی سیکیورٹی بیگز لازمی قرار دیے گئے۔

٣۔ پنک ڈائمنڈ ہیسٹ – 2025 (25 ملین ڈالر):
تازہ ترین واردات میں تین رکنی گروہ نے ایک نایاب گلابی ہیرا لوٹنے کی منصوبہ بندی کی۔ ملزمان نے ایک تاجر کو قیمتی ہیرا دکھانے کے بہانے دبئی کے ولا میں بلایا اور ہیرا چھیننے کی کوشش کی۔ تاہم دبئی پولیس کی جدید "آپریشن پنک ڈائمنڈ” حکمتِ عملی کے تحت صرف آٹھ گھنٹوں میں تمام ملزمان گرفتار ہوئے اور 25 ملین ڈالر مالیت کا یہ ہیرا بحفاظت برآمد کر لیا گیا۔ اس کارروائی میں مصنوعی ذہانت اور جدید ٹیکنالوجی استعمال کی گئی، جس نے دبئی کو ایک بار پھر دنیا کے محفوظ ترین شہروں میں نمایاں کر دیا۔