خلیج اردو
دبئی: متحدہ عرب امارات میں وفاقی ادارہ برائے شناخت، شہریت، کسٹمز اور بارڈر سکیورٹی نے شناختی کارڈ میں رجسٹرڈ موبائل نمبر تبدیل کرنے کا نیا طریقہ کار جاری کر دیا ہے۔ اس سہولت کے تحت رہائشی افراد بآسانی اپنے شناختی کارڈ سے منسلک پرانا نمبر اپ ڈیٹ یا نیا نمبر درج کر سکیں گے۔
ادارے کے مطابق شہری اور مقیم افراد اب یہ تبدیلی آن لائن سروس کے ذریعے کر سکیں گے جس کے لیے ویب سائٹ اور اسمارٹ ایپ دونوں استعمال کی جا سکیں گی۔ اس عمل کے دوران شناختی کارڈ نمبر درج کرنے کے بعد ایک وقتی خفیہ کوڈ (ون ٹائم پاس ورڈ) نئے موبائل نمبر پر بھیجا جائے گا جسے درج کر کے عمل مکمل ہوگا۔
دبئی کے جنرل ڈائریکٹوریٹ آف ریزیڈنسی اینڈ فارنرز افیئرز نے واضح کیا ہے کہ یہ سہولت رہائشیوں کے لیے مختلف سرکاری خدمات حاصل کرنے میں آسانی پیدا کرے گی کیونکہ بیشتر سرکاری کارروائیاں شناختی کارڈ سے منسلک موبائل نمبر پر بھیجے گئے تصدیقی کوڈ پر منحصر ہوتی ہیں۔
ادارے نے عوام کو مشورہ دیا ہے کہ وہ اپنے شناختی کارڈ سے جڑے موبائل نمبروں کو ہمیشہ درست اور فعال رکھیں تاکہ کسی بھی قسم کی سروس میں رکاوٹ پیدا نہ ہو۔ اس اقدام کو صارفین کے لیے سہولت اور فراڈ سے بچاؤ کے لیے اہم قدم قرار دیا جا رہا ہے۔
