دبئی: لولو ہائپرمارکیٹ البرشا اے سی اور ریفریجریشن خرابی کے بعد دوبارہ کھلنے کا اعلان

خلیج اردو
دبئی: لولو ہائپرمارکیٹ البرشا ایک تکنیکی خرابی کے باعث ہفتے کے روز معمول کے وقت پر نہیں کھل سکا، تاہم انتظامیہ نے تصدیق کی ہے کہ ہائپرمارکیٹ آج ہفتہ کی شام 5 بجے دوبارہ کھول دیا جائے گا۔ خلیج ٹائمز سے گفتگو کرتے ہوئے کمپنی کے ترجمان نے بتایا کہ ہائپرمارکیٹ کے اندر ایئر کنڈیشننگ اور ریفریجریشن سسٹم میں تکنیکی مسئلہ پیدا ہوا تھا، جس کا علم اسٹور منیجر کو صبح تقریباً 7 بجے ہوا، جس کے بعد احتیاطی اقدام کے طور پر صبح 8 بجے صارفین کے لیے اسٹور نہ کھولنے کا فیصلہ کیا گیا۔

ترجمان کے مطابق انجینئرز نے فوری طور پر خرابی دور کرنے کا کام شروع کیا اور اب اس بات کی تصدیق کر دی گئی ہے کہ مال کی عمارت آج شام 5 بجے دوبارہ کھل جائے گی۔ انہوں نے مزید بتایا کہ ہائپرمارکیٹ کا ضروری عملہ اور عمارت میں موجود دیگر اداروں کے ملازمین پہلے ہی اندر موجود ہیں، جبکہ مسئلہ مکمل طور پر حل کر لیا گیا ہے تاکہ صارفین کو کسی قسم کی پریشانی کا سامنا نہ کرنا پڑے۔