خلیج اردو
ابوظہبی: متحدہ عرب امارات کی وزارتِ افرادی قوت و اماراتائزیشن (MoHRE) نے نجی شعبے کی کمپنیوں کو خبردار کیا ہے کہ اگر انہوں نے اماراتی شہریوں کی بھرتی کے اہداف 31 دسمبر 2025 تک پورے نہ کیے تو انہیں مالی اور قانونی کارروائیوں کا سامنا کرنا پڑے گا۔
وزارت کے مطابق، اماراتائزیشن ضوابط کے تحت آنے والے نجی اداروں کو ہدایت کی گئی ہے کہ وہ اماراتی شہریوں کو ماہر اور ہنرمند عہدوں پر بھرتی کرنے کے لیے اپنی کوششیں تیز کریں تاکہ سال 2025 کے مقررہ اہداف حاصل کیے جا سکیں۔
وزارت نے واضح کیا کہ یکم جنوری 2026 سے وہ کمپنیاں جو مطلوبہ شرحِ اماراتائزیشن حاصل کرنے میں ناکام رہیں گی، ان پر مخصوص مالی واجبات عائد کیے جائیں گے۔ اس اقدام کا مقصد نجی اداروں کو اماراتی شہریوں کی تقرری اور انہیں ملازمت پر برقرار رکھنے کی ذمہ داری کا احساس دلانا ہے، جو کہ قومی روزگار پالیسی کا ایک اہم جزو ہے۔
وزارت نے مزید کہا کہ 50 یا اس سے زیادہ ملازمین رکھنے والی کمپنیوں کو ہدایت دی گئی ہے کہ وہ ہر سال ماہر عہدوں پر اماراتی شہریوں کی تعداد میں 2 فیصد اضافہ کریں۔ اسی طرح 20 سے 49 ملازمین والی کمپنیوں، خصوصاً تیزی سے ترقی پانے والے شعبوں میں، کم از کم ایک اماراتی شہری کو بھرتی کرنے اور موجودہ عملے کو برقرار رکھنے کا پابند کیا گیا ہے۔
وزارت کے مطابق، ان اہداف کی عدم تکمیل پر نہ صرف مالی جرمانے بلکہ کمپنی کی درجہ بندی میں کمی، اور لازمی اصلاحی اقدامات جیسے قانونی نتائج بھی بھگتنے ہوں گے۔
