امریکا میں حکومتی شٹ ڈاؤن کے اثرات، ایک ہزار سے زائد پروازیں منسوخ

خلیج اردو

امریکا میں حکومتی شٹ ڈاؤن کے باعث جمعے کے روز ایک ہزار سے زائد پروازیں منسوخ کردی گئیں۔ صدر ڈونالڈ ٹرمپ کی انتظامیہ نے ایئر ٹریفک کنٹرولرز پر دباؤ کم کرنے کے لیے پروازوں میں کٹوتی کا حکم دیا ہے، کیونکہ بہت سے سرکاری ملازمین بغیر تنخواہ کے کام کر رہے ہیں۔

ذرائع کے مطابق اٹلانٹا، نیوارک، ڈینور، شکاگو، ہیوسٹن اور لاس اینجلس سمیت چالیس بڑے ہوائی اڈوں پر پروازوں میں کمی کی گئی ہے۔ ریپبلکن اور ڈیموکریٹس کے درمیان صحت انشورنس سبسڈیز پر اختلافات کی وجہ سے یکم اکتوبر سے حکومتی فنڈز کی مدت ختم ہونے کے بعد کئی وفاقی ادارے مفلوج ہو چکے ہیں۔

فیڈرل ایوی ایشن ایڈمنسٹریشن (ایف اے اے) کے مطابق، واشنگٹن کے ریگن نیشنل ایئرپورٹ پر اوسطاً چار گھنٹے کی تاخیر دیکھی گئی، جب کہ فینکس میں نوے منٹ، اور شکاگو و سان فرانسسکو میں ایک ایک گھنٹے کی تاخیر رپورٹ ہوئی۔