خلیج اردو
دبئی: دبئی پولیس نے مرکزی شاہراہوں پر تیزرفتار لین استعمال کرنے والے ڈلیوری رائیڈرز کے خلاف سخت کارروائی کرتے ہوئے 8 ہزار 152 خلاف ورزیاں درج کی ہیں۔ یہ کارروائی اس نئے ضابطے کے تحت کی گئی جو یکم نومبر سے نافذ ہوا ہے، جس کا مقصد ڈلیوری موٹرسائیکلز، ہیوی گاڑیوں اور بسوں کی آمدورفت کو منظم کرنا ہے۔
پولیس کے مطابق گزشتہ چند برسوں میں ڈلیوری رائیڈرز کے بڑھتے ہوئے ٹریفک حادثات کے بعد ان کی نقل و حرکت کو محفوظ بنانے کے لیے یہ فیصلہ ضروری قرار دیا گیا۔ مرکزی اور سب آرٹیریل روڈز پر تیز لین اب موٹرسائیکل سواروں کے لیے سختی سے ممنوع ہے، جبکہ خلاف ورزی کی صورت میں فوری جرمانے عائد کیے جا رہے ہیں۔
یہ مہم دبئی میں ٹریفک سسٹم کو محفوظ، فعال اور عالمی معیار کے مطابق رکھنے کے اقدامات کا حصہ ہے۔
