خلیج اردو
سلطنتِ عمان نے سائنسی اعداد و شمار کی بنیاد پر رمضان المبارک 2026 کے آغاز کی سرکاری تاریخ کا اعلان کر دیا، یوں عمان خلیجی ممالک میں پہلا ملک بن گیا جس نے باضابطہ تاریخ جاری کی۔
عمان کی مرکزی رویتِ ہلال کمیٹی کے مطابق 29 شعبان 1447ھ بروز منگل 17 فروری کو چاند غروبِ آفتاب سے پہلے یا اسی وقت غروب ہو جائے گا، جس کے باعث اس روز ہلال کی رویت فلکیاتی طور پر ناممکن ہے۔
کمیٹی نے کہا کہ "جب فلکیاتی حقائق رویت کے ناممکن ہونے کی تصدیق کریں تو سائنسی یقین کے برعکس شہادت قبول نہیں کی جا سکتی”، لہٰذا بدھ 18 فروری 2026 کو شعبان کا آخری دن قرار دیا گیا ہے۔
اعلان کے مطابق جمعرات 19 فروری 2026 کو یکم رمضان المبارک ہوگا۔
دوسری جانب متحدہ عرب امارات میں شارجہ اکیڈمی برائے فلکیات، خلائی سائنس و ٹیکنالوجی نے بھی پیش گوئی کی ہے کہ 17 فروری کو چاند کی رویت ممکن نہیں، حتیٰ کہ جدید دوربینوں سے بھی نہیں۔
ماہرین کے مطابق اسی بنا پر بیشتر اسلامی ممالک میں بھی رمضان المبارک کا آغاز 19 فروری کو متوقع ہے۔
فلکیاتی بنیادوں پر پیشگی اعلان نے خطے میں رمضان کے آغاز سے متعلق غیر یقینی صورتحال کو کافی حد تک واضح کر دیا ہے۔
