خلیج اردو
متحدہ عرب امارات نے رمضان المبارک کے دوران نجی شعبے کے ملازمین کے اوقاتِ کار میں کمی کا اعلان کر دیا ہے۔ وزارتِ انسانی وسائل و اماراتی امور (موہرے) کے مطابق اسلامی مہینے میں یومیہ اوقات کار دو گھنٹے کم ہوں گے۔
موہرے کا کہنا ہے کہ نجی کمپنیاں اپنے کاروباری تقاضوں اور کام کی نوعیت کے مطابق لچکدار یا ریموٹ ورک کا نظام بھی اپنا سکتی ہیں، تاہم یہ سہولت مقررہ یومیہ اوقات کار کے دائرے میں ہوگی۔
یو اے ای میں ملازمین عموماً روزانہ آٹھ سے نو گھنٹے کام کرتے ہیں، رمضان میں ان اوقات میں دو گھنٹے کمی ہوگی۔ کم شدہ اوقات سے زائد کام کو اوور ٹائم تصور کیا جائے گا جس پر اضافی معاوضہ دیا جائے گا۔
سرکاری شعبے کے ملازمین کے اوقات کار بھی کم کر دیے گئے ہیں۔ پیر سے جمعرات تک اوقات صبح 9 بجے سے دوپہر 2:30 بجے تک ہوں گے، جبکہ جمعہ کو صبح 9 بجے سے دوپہر 12 بجے تک کام ہوگا۔ البتہ بعض ملازمین جن کی ملازمت کی نوعیت مختلف ہے، ان پر یہ اطلاق نہیں ہوگا۔
ماہرینِ انسانی وسائل کے مطابق کم اوقات کار ملازمین کو عبادت، اہل خانہ اور ذاتی مصروفیات کے لیے زیادہ وقت فراہم کرتے ہیں۔ اگرچہ ابتدائی دن کچھ مشکل ہو سکتے ہیں، تاہم یہ نظام کام کو زیادہ منظم اور مؤثر بنانے میں مددگار ثابت ہوتا ہے۔
رمضان المبارک کے چاند کی رویت 17 فروری کو متوقع ہے، تاہم فلکیاتی حساب کے مطابق اس روز چاند نظر آنے کا امکان کم ہے۔ امکان ہے کہ شعبان کے 30 دن مکمل ہونے کے بعد یو اے ای سمیت بیشتر ممالک میں رمضان کا آغاز جمعرات 19 فروری سے ہوگا۔
یہ فیصلہ رمضان کے روحانی ماحول کو مدنظر رکھتے ہوئے کیا گیا ہے تاکہ عبادت اور پیشہ ورانہ ذمہ داریوں میں بہتر توازن قائم رکھا جا سکے۔
