خلیج اردو
ابوظہبی: متحدہ عرب امارات کے وزیر خارجہ شیخ عبداللہ بن زاید النہیان اور سات ممالک کے وزرائے خارجہ نے امریکی صدر ڈونلڈ ٹرمپ کے غزہ امن منصوبے کا خیرمقدم کیا ہے اور اس بات کا اعادہ کیا ہے کہ وہ امریکہ کے ساتھ مل کر جنگ کے خاتمے اور جامع امن کے قیام کے لیے کام کریں گے۔
امریکی صدر نے اسرائیلی وزیر اعظم کی منظوری کے بعد 20 نکاتی امن فارمولا پیش کیا، جس میں جنگ بندی، حماس کے یرغمالیوں کی رہائی، حماس کا غیر مسلح ہونا اور بتدریج اسرائیلی انخلا شامل ہے۔ مشترکہ بیان میں سعودی عرب، قطر، مصر، اردن، ترکی، انڈونیشیا اور پاکستان کے وزرائے خارجہ نے کہا کہ وہ امریکہ اور تمام فریقین کے ساتھ مثبت اور تعمیری تعاون کے لیے تیار ہیں تاکہ معاہدے کو حتمی شکل دی جا سکے اور اس پر عمل درآمد یقینی بنایا جا سکے۔
وزرائے خارجہ نے صدر ٹرمپ کے اعلان کا خیر مقدم کرتے ہوئے کہا کہ یہ معاہدہ غزہ کی تعمیر نو، فلسطینی عوام کے جبری انخلا کی روک تھام، یرغمالیوں کی رہائی، تمام فریقین کی سلامتی کو یقینی بنانے والے سیکیورٹی میکنزم، مکمل اسرائیلی انخلا اور بلا روک ٹوک انسانی امداد کی فراہمی کی ضمانت دیتا ہے۔ مزید کہا گیا کہ یہ منصوبہ دو ریاستی حل کی بنیاد پر ایک آزاد فلسطینی ریاست کے قیام کی راہ ہموار کرے گا جس کے تحت غزہ اور مغربی کنارہ بین الاقوامی قانون کے مطابق ضم ہوں گے تاکہ خطے میں امن، سلامتی اور استحکام قائم ہو سکے۔
