یو اے ای میں نومبر کے لیے پیٹرول کی قیمتوں کا اعلان آج متوقع، شہریوں کو کمی کی امید

خلیج اردو

دبئی: متحدہ عرب امارات میں نومبر کے لیے پیٹرول کی قیمتوں کا اعلان آج کیا جائے گا۔ اکتوبر میں اضافے کے بعد موٹر سوار اب قیمتوں میں کمی کی امید لگائے بیٹھے ہیں۔

عالمی منڈی میں خام تیل کی قیمتوں میں کمی اور جغرافیائی کشیدگی میں کمی آنے سے پیٹرول کی قیمتوں میں ممکنہ کمی کے امکانات پیدا ہوئے ہیں، تاہم حتمی فیصلہ عالمی مارکیٹ کے آئندہ دنوں کے رجحان پر منحصر ہے۔

اکتوبر میں اضافہ
گزشتہ ماہ یو اے ای میں پیٹرول کی قیمتوں میں 7 سے 8 فلس تک اضافہ ہوا تھا۔ سپر 98 پیٹرول 2.77 درہم فی لٹر، اسپیشل 95 پیٹرول 2.66 درہم، ای پلس 91 پیٹرول 2.58 درہم، جبکہ ڈیزل 2.71 درہم فی لٹر تک جا پہنچا تھا، جو ستمبر میں 2.66 درہم تھا۔

متحدہ عرب امارات نے 2015 میں ایندھن کی قیمتوں کو عالمی منڈی کے مطابق آزاد کیا تھا، جس کے بعد سے ماہانہ بنیادوں پر قیمتیں عالمی خام تیل کے اتار چڑھاؤ سے منسلک ہیں۔

عالمی منڈی کے رجحانات
جمعرات کو برینٹ خام تیل کی قیمت 65 ڈالر فی بیرل سے ذرا کم رہی۔ حالیہ ٹرمپ اور ژی جن پنگ ملاقات کے بعد تجارتی تعلقات میں بہتری کے اشاروں نے معیشت اور تیل کی طلب کے لیے مثبت توقعات پیدا کی ہیں، جس سے قیمتوں کو سہارا مل سکتا ہے۔

اس سے چند روز قبل امریکی پابندیوں کے بعد روسی کمپنیوں پر دباؤ بڑھنے سے برینٹ خام تیل ایک ہی سیشن میں 5.4 فیصد بڑھ گیا، جو جون کے بعد سب سے بڑا ہفتہ وار اضافہ تھا۔

کویت کے وزیرِ تیل نے بھی عندیہ دیا ہے کہ اگر طلب بڑھی تو اوپیک پیداوار میں اضافہ کر سکتا ہے، جس سے قیمتوں پر اوپر کی جانب دباؤ پیدا ہو سکتا ہے۔

ماہرین کے مطابق اگرچہ رواں ماہ کے آغاز میں قیمتوں میں کمی کی توقع تھی، لیکن نئی امریکی پابندیوں نے یہ امکان الٹ دیا ہے۔