خلیج اردو
متحدہ عرب امارات میں وزارت افرادی قوت و اماراتی کاری (موہری) یکم جولائی 2025 سے نجی شعبے میں اماراتی ملازمین سے متعلق اہداف کی تکمیل کی جانچ کا عمل شروع کرے گی۔ اس سلسلے میں یہ بھی دیکھا جائے گا کہ آیا کمپنیاں اماراتی ملازمین کو سوشل سیکیورٹی فنڈ میں رجسٹر کر رہی ہیں اور لازمی ماہانہ ادائیگیاں باقاعدگی سے ادا کی جا رہی ہیں یا نہیں۔
ان قواعد کا اطلاق اُن نجی کمپنیوں پر ہوگا جن کے ملازمین کی تعداد 50 یا اس سے زیادہ ہے۔ ایسی کمپنیوں کو 2025 کی پہلی ششماہی کے دوران اماراتی ملازمین کی تعداد میں کم از کم ایک فیصد اضافہ کرنا لازم ہوگا، اور یہ ہدف 30 جون تک حاصل کیا جانا چاہیے۔
امارات کاری کی قومی پالیسی کے مطابق، کمپنیوں کو ہر سال کم از کم دو فیصد اماراتی ملازمین کی شرح بڑھانی ہوتی ہے: ایک فیصد سال کے پہلے حصے میں اور ایک فیصد دوسرے حصے میں۔ اس حساب سے کمپنیوں کو 30 جون تک ہنر مند شعبوں میں اماراتیوں کی ملازمت کی شرح 7 فیصد تک پہنچانی ہے، جبکہ 31 دسمبر تک یہ شرح 8 فیصد ہونی چاہیے۔
ان اہداف پر عمل نہ کرنے والی کمپنیوں کو ہر غیر مقرر اماراتی ملازم پر ماہانہ جرمانے کا سامنا کرنا پڑے گا، جو ہزاروں درہم تک جا سکتے ہیں۔
وزارت نے بتایا ہے کہ 2026 کے اختتام تک امارات کاری کا مجموعی ہدف ہنر مند شعبے میں 10 فیصد تک پہنچانا ہے۔ جعلی امارات کاری یا اہداف کو چکمہ دینے کی کوششوں کی روک تھام کے لیے ایک ڈیجیٹل فیلڈ انسپیکشن سسٹم استعمال کیا جا رہا ہے۔ اس نظام کے تحت جولائی 2022 سے اپریل 2025 کے دوران تقریباً 2,200 ادارے قانون شکنی میں ملوث پائے گئے جن کے خلاف قانونی کارروائی کی جا چکی ہے۔
وزارت کے مطابق اپریل 2025 کے آخر تک 28,000 سے زائد کمپنیوں میں 1 لاکھ 36 ہزار سے زیادہ اماراتی شہری نجی شعبے میں کام کر رہے ہیں، جو ایک تاریخی سنگ میل ہے۔
وزارت کی معاون انڈر سیکریٹری برائے قومی ٹیلنٹ، فریدہ العلی نے کہا کہ، "ہم نے لیبر مارکیٹ میں جس قابل قدر ترقی کا مشاہدہ کیا ہے، وہ ملک کی تیز رفتار اقتصادی ترقی کے ساتھ مل کر نجی کمپنیوں کی اہداف تک پہنچنے کی صلاحیت کو مزید بڑھاتی ہے۔”
انہوں نے مزید بتایا کہ وزارت ان کمپنیوں کو مراعات اور فوائد بھی فراہم کرے گی جو امارات کاری کے اہداف شاندار طریقے سے حاصل کریں گی۔ ان مراعات میں MoHRE کی فیسوں میں 80 فیصد تک رعایت اور سرکاری خریداری نظام میں ترجیحی رسائی شامل ہے۔
