خلیج اردو
ابوظہبی: وفاقی ٹیکس اتھارٹی نے ایک نئی پہل ’’اماراتی ٹیکس ایجنٹ‘‘ کے نام سے متعارف کرائی ہے جو یکم جنوری 2026 سے شروع ہوگی۔ اس پروگرام کے تحت اگلے تین برسوں میں 500 اماراتی شہریوں کو تربیت دے کر تصدیق شدہ ٹیکس ایجنٹ بنایا جائے گا تاکہ ٹیکس کے شعبے میں مقامی ماہرین کی نئی نسل تیار کی جا سکے۔
یہ اقدام شیخ محمد بن راشد المکتوم، نائب صدر و وزیر اعظم متحدہ عرب امارات و حکمران دبئی کے شروع کردہ ’’اسٹارٹ اپ کیپیٹل آف دی ورلڈ‘‘ مہم کا حصہ ہے۔ اس منصوبے میں وفاقی ٹیکس اتھارٹی اور نیو اکانومی اکیڈمی کے درمیان شراکت داری کے ذریعے ملکی افرادی قوت کو بااختیار بنانا مقصد ہے۔
وفاقی ٹیکس اتھارٹی کے ڈائریکٹر جنرل خالد البستانی نے کہا کہ انہیں اس پروگرام پر فخر ہے۔ انہوں نے بتایا کہ اماراتی ٹیکس ایجنٹ پروگرام کے ذریعے شہریوں کے لیے جامع اور خصوصی تربیتی نصاب فراہم کیا جائے گا تاکہ وہ ویلیو ایڈڈ ٹیکس اور کارپوریٹ ٹیکس کے ڈپلومے حاصل کر سکیں۔ یہ اقدام اس اہم شعبے میں اماراتی صلاحیتوں پر انحصار کو مضبوط کرے گا۔
خالد البستانی نے کہا کہ ٹیکس ایجنٹس کی مانگ بڑھ رہی ہے اور یہ پروگرام شہریوں کو اس شعبے کی طرف راغب کرنے کا ایک بڑا موقع ہے۔ انہوں نے کہا کہ یہ ایک نیا میدان ہے جس میں ملکی مہارت کی ضرورت ہے۔ امیدواروں کے لیے تربیتی مراحل، انٹرویوز اور اہلیت کے امتحانات ہوں گے۔
وفاقی ٹیکس اتھارٹی کی ڈائریکٹر برائے ٹیکس کمپلائنس و انفورسمنٹ سارہ الحبشی کے مطابق اس پروگرام کا بنیادی مقصد تین سال میں تقریباً 500 اماراتی ٹیکس ایجنٹس کو بااختیار بنانا ہے۔ انہوں نے کہا کہ ٹیکس کا شعبہ نیا ہے، جو 2017 اور 2018 میں ٹیکس قوانین کے اجرا کے بعد سامنے آیا، اس لیے ابھی ماہرین کی شدید ضرورت ہے۔
پروگرام کے تحت شرکاء کو ویلیو ایڈڈ ٹیکس اور کارپوریٹ ٹیکس کے قوانین، رجسٹریشن، ٹیکس ریٹرن کی تیاری، اکاؤنٹنگ ریکارڈز کے انتظام اور دیگر عملی پہلوؤں کی تربیت دی جائے گی۔ ساتھ ہی انہیں مارکیٹنگ اور تجزیاتی مہارتوں کی تربیت بھی دی جائے گی تاکہ وہ پیشہ ورانہ سطح پر ٹیکس مشاورت فراہم کر سکیں۔
اس پروگرام کے آخر میں شرکاء کو سرکاری رجسٹریشن، لائسنسنگ اور وفاقی ٹیکس اتھارٹی کی جانب سے بطور تصدیق شدہ ٹیکس ایجنٹ تسلیم کیا جائے گا۔ اس کے دو خصوصی ڈپلومے متعارف کرائے گئے ہیں۔
وی اے ٹی ڈپلومہ چھ روزہ جامع تربیتی پروگرام ہے جس میں ویلیو ایڈڈ ٹیکس کے قانونی و ریگولیٹری پہلو، رجسٹریشن کا عمل، ٹیکس ریٹرن کی تیاری، اکاؤنٹنگ ریکارڈز کی دیکھ بھال اور عملی مطالعات شامل ہوں گے۔
کارپوریٹ ٹیکس ڈپلومہ گیارہ روزہ تربیتی پروگرام ہے جس میں کارپوریٹ ٹیکس کے قانونی و انتظامی پہلو، کاروباری رجسٹریشن، ٹیکس ریٹرن کی تیاری، اکاؤنٹنگ منافع کے حساب اور ٹیکس ذمہ داری کے تعین کے عملی مطالعے شامل ہوں گے۔
پروگرام میں داخلے کے لیے امیدوار کے پاس ٹیکس، اکاؤنٹنگ یا قانون میں بیچلر یا ماسٹر ڈگری ہونی چاہیے۔ اگر ڈگری کسی اور مضمون میں ہو تو بین الاقوامی سطح پر تسلیم شدہ ٹیکس سرٹیفکیٹ بھی قابل قبول ہوگا۔ امیدوار کے پاس کم از کم تین سالہ متعلقہ تجربہ ہونا ضروری ہے۔
ان امیدواروں کے لیے جن کے پاس مخصوص تعلیمی پس منظر نہیں، لیکن دیگر تسلیم شدہ پیشہ ورانہ سرٹیفیکیٹس یا پانچ سالہ مالیاتی تجربہ ہے، پروگرام میں شمولیت کا موقع رکھا گیا ہے تاکہ اس شعبے میں درست اور معیاری مشاورت فراہم کی جا سکے۔
