خلیج اردو
نیشنل سینٹر آف میٹرولوجی کے مطابق پیر پانچ جنوری کو متحدہ عرب امارات کے انتہائی شمالی علاقوں میں ہلکی بارش کا امکان ہے، جبکہ مجموعی طور پر موسم صاف سے جزوی طور پر ابر آلود رہے گا۔ محکمہ موسمیات کا کہنا ہے کہ مشرقی اور شمالی علاقوں میں نچلے بادل بن سکتے ہیں، جبکہ مغربی حصوں میں درجہ حرارت میں نمایاں کمی متوقع ہے۔
محکمہ موسمیات کے مطابق ابوظبی میں کم سے کم درجہ حرارت سولہ ڈگری سینٹی گریڈ اور دبئی میں اٹھارہ ڈگری رہنے کا امکان ہے، جبکہ زیادہ سے زیادہ درجہ حرارت ابوظبی میں پچیس اور دبئی میں چھبیس ڈگری سینٹی گریڈ تک جا سکتا ہے۔
رات کے وقت اور منگل کی صبح اندرونی اور ساحلی مغربی علاقوں میں نمی میں اضافہ متوقع ہے، جس کے باعث دھند یا ہلکی دھند بننے کا امکان بھی ظاہر کیا گیا ہے۔ ہوائیں شمال مغرب سے شمال مشرق کی سمت ہلکی سے معتدل رہیں گی، جو بعض اوقات تیز ہو کر دس سے پچیس کلومیٹر فی گھنٹہ اور جھکڑوں کی صورت میں چالیس کلومیٹر فی گھنٹہ تک پہنچ سکتی ہیں۔
محکمہ موسمیات کے مطابق خلیج عرب میں سمندر بعض اوقات معتدل سے شدید جبکہ بحیرہ عمان میں ہلکا رہے گا۔ حکام نے پیر سے آٹھ جنوری تک ملک بھر میں غیر مستحکم موسمی صورتحال سے خبردار کیا ہے، جس کے دوران مختلف علاقوں میں گرد آلود موسم، جزوی ابر آلود آسمان، بعض اوقات دھند یا ہلکی دھند، نمایاں ہوائیں خصوصاً سمندر میں، اور وقفے وقفے سے ہلکی بارش کا امکان رہے گا۔
