یو اے ای کا غزہ امن منصوبے کے دوسرے مرحلے کا خیرمقدم، عبوری انتظامیہ کی حمایت

ابوظہبی: متحدہ عرب امارات نے غزہ کے لیے جامع امن منصوبے کے دوسرے مرحلے کا خیرمقدم کرتے ہوئے غزہ پٹی کے انتظام کے لیے فلسطینی نیشنل کمیٹی کے قیام کی حمایت کا اعلان کیا ہے، جو اقوامِ متحدہ کی سلامتی کونسل کی قرارداد 2803 کے تحت ایک عارضی عبوری انتظامی ادارے کے طور پر تشکیل دی گئی ہے۔

وزیر مملکت برائے بین الاقوامی تعاون، ریِم بنت ابراہیم الہاشمی نے اپنے بیان میں امریکی صدر ڈونلڈ ٹرمپ کی جانب سے پیس کونسل کے اعلان کو سراہا اور اسے استحکام کے فروغ اور سیاسی عمل کو آگے بڑھانے کے لیے ایک معاون فریم ورک قرار دیا۔

انہوں نے اس تناظر میں صدر ٹرمپ کی قیادت کی تعریف کی اور قطر، مصر اور ترکی کی جانب سے کی جانے والی مسلسل ثالثی کوششوں کو بھی خراجِ تحسین پیش کیا، جن کے بقول خطے میں امن اور سلامتی کے امکانات کو مضبوط بنانے میں اہم کردار ادا کیا گیا ہے۔

ریِم الہاشمی نے غزہ ایگزیکٹو کونسل میں اپنی تقرری پر فخر کا اظہار کرتے ہوئے کہا کہ یہ فیصلہ سفارتکاری کے حوالے سے متحدہ عرب امارات کے مؤثر طرزِ عمل اور امن کی کوششوں میں اس کے دیرینہ کردار پر عالمی اعتماد کی عکاسی کرتا ہے۔

انہوں نے کہا کہ یہ تقرری اس یقین کو تقویت دیتی ہے کہ پیچیدہ سیاسی اور انسانی مسائل کو غزہ اور پورے خطے کے عوام کے لیے عملی مواقع میں بدلا جا سکتا ہے۔

انہوں نے مزید کہا کہ متحدہ عرب امارات کا ماننا ہے کہ پائیدار امن کے حصول کے لیے مربوط عالمی اقدام اور غزہ میں مؤثر طرزِ حکمرانی ناگزیر ہے۔ اس عمل سے فلسطینی عوام کے جائز حقوق اور خواہشات کو یقینی بنانا، استحکام کو مضبوط کرنا اور ایک معتبر امن عمل کی حمایت ضروری ہے جو خطے کے لیے محفوظ اور خوشحال مستقبل کی بنیاد رکھے۔

ریِم الہاشمی نے اس بات پر زور دیا کہ غزہ امن منصوبے کے تحت حاصل ہونے والی پیش رفت کو آگے بڑھایا جائے اور ایک جامع سیاسی عمل کی بحالی کے لیے کام کیا جائے، جو بالآخر دو ریاستی حل اور منصفانہ و دیرپا تصفیے کی جانب لے جائے۔