خلیج اردو
متحدہ عرب امارات نے سوڈان کے لیے امریکا کے جامع امن منصوبے کا خیرمقدم کیا ہے۔ وزارت خارجہ میں وزیر مملکت اور کابینہ رکن شیخ شخبوط بن نہیان النہیان نے امریکی صدر کے مشیر برائے عرب و افریقی امور مسعد بولوس کی جانب سے اعلان کردہ امن منصوبے کو اہم پیش رفت قرار دیا۔
امریکی امن منصوبہ پانچ بنیادی نکات پر مشتمل ہے، جن میں فوری انسانی بنیادوں پر جنگ بندی، مستقل انسانی رسائی اور شہریوں کا تحفظ، مستقل سیزفائر، سویلین قیادت میں سیاسی منتقلی اور جنگ کے بعد تعمیر نو شامل ہیں۔
شیخ شخبوط بن نہیان نے امریکی صدر ڈونلڈ ٹرمپ کی قیادت کو سراہتے ہوئے کہا کہ ان کی کوششوں سے سوڈان کو مزید انتہاپسندی، انتشار اور سنگین انسانی بحران کی طرف جانے سے روکا جا رہا ہے۔
انہوں نے اس بات پر زور دیا کہ یو اے ای فوری جنگ بندی اور غیر مشروط انسانی سیزفائر کے لیے علاقائی اور عالمی کوششوں کی مکمل حمایت جاری رکھے گا، تاکہ پورے سوڈان میں بلا رکاوٹ، محفوظ اور فوری انسانی امداد ممکن بنائی جا سکے۔
شیخ شخبوط کا کہنا تھا،
"یہ اقدامات ایک ایسے عبوری عمل کی راہ ہموار کریں گے جو متحارب فریقین اور انتہاپسند گروہوں سے آزاد ہو اور سوڈانی عوام کی سویلین حکومت کی خواہشات کے مطابق ہو۔”
وزیر مملکت نے کوآڈ کے ساتھ مل کر کام کرنے کے عزم کا اعادہ کرتے ہوئے کہا کہ فوری سیزفائر پائیدار، سویلین سیاسی حل کے لیے جاری کوششوں کو مضبوط بنائے گا، جس میں سوڈانی عوام کے مفادات کو اولین ترجیح حاصل ہوگی۔
انہوں نے 3 فروری کو واشنگٹن میں امریکا کی جانب سے منعقدہ انسانی کانفرنس اور کوآڈ اجلاس پر بھی شکریہ ادا کیا۔ کانفرنس کے دوران یو اے ای نے سوڈان کے لیے اضافی 500 ملین ڈالر کی انسانی امداد کا اعلان کیا۔
