خلیج اردو
متحدہ عرب امارات کے نیشنل سینٹر آف میٹرولوجی نے 25 سے 29 دسمبر تک کے موسم سے متعلق پیشگوئی جاری کرتے ہوئے بتایا ہے کہ اس دوران ملک میں مجموعی طور پر خوشگوار اور معتدل موسم رہے گا، تاہم رات کے اوقات میں کمزور کم دباؤ کے نظام کے گزرنے کے باعث موسم قدرے ٹھنڈا محسوس ہوگا۔
محکمہ موسمیات کے مطابق اس عرصے کے دوران درمیانے اور نچلے درجے کے بادلوں کی آمد متوقع ہے، جبکہ وقفے وقفے سے ہلکی سے درمیانی بارش کا امکان بھی موجود ہے۔ بارش کا زیادہ امکان جزائر اور شمالی علاقوں میں رہے گا، جبکہ ملک کے انتہائی شمالی حصوں میں بعض اوقات بارش شدت اختیار کر سکتی ہے۔
بیان میں مزید کہا گیا ہے کہ ہوائیں جنوب مغرب سے شمال مغرب کی سمت چلیں گی جو عموماً ہلکی سے درمیانی رفتار کی ہوں گی، تاہم بعض اوقات تیز بھی ہو سکتی ہیں۔ سمندر کی صورتحال زیادہ تر ہلکی سے معتدل رہے گی، البتہ اتوار کے روز شمال مغربی ہواؤں کے داخل ہونے کے باعث سمندر میں طغیانی آ سکتی ہے۔
نیشنل سینٹر آف میٹرولوجی نے واضح کیا ہے کہ موسم کی صورتحال پر چوبیس گھنٹے نظر رکھی جا رہی ہے اور عوام کو بروقت سرکاری ذرائع کے ذریعے آگاہ کیا جاتا رہے گا۔
1 منٹ
