خلیج اردو
عجمان پولیس نے شہریوں میں ٹریفک قوانین کی آگاہی بڑھانے اور حادثات کی شرح کم کرنے کے لیے دو ماہ پر مشتمل مہم کا آغاز کیا ہے، جس میں شہریوں سے اپیل کی گئی ہے کہ بغیر لائسنس گاڑی چلانے سے گریز کریں۔
یہ مہم ٹریفک اینڈ پیٹرولز ڈیپارٹمنٹ کی جانب سے شروع کی گئی ہے، جس کا مقصد عوام میں ذمہ دارانہ ڈرائیونگ کا شعور پیدا کرنا ہے۔ حکام کے مطابق بغیر لائسنس گاڑی چلانا نہ صرف قانون کی خلاف ورزی ہے بلکہ یہ ڈرائیور اور سڑک پر موجود دیگر افراد کی جانوں کے لیے خطرہ ہے۔
لیفٹیننٹ کرنل الخاجہ نے کہا کہ ڈرائیونگ لائسنس اس بات کا ثبوت ہے کہ ڈرائیور نے مناسب تربیت حاصل کی ہے اور وہ ٹریفک قوانین کو سمجھتا ہے جو سڑکوں کو محفوظ رکھنے کے لیے بنائے گئے ہیں۔ انہوں نے وضاحت کی کہ سیاح اور وزیٹرز بین الاقوامی لائسنس کے ساتھ گاڑی چلا سکتے ہیں، لیکن رہائشیوں کے لیے لازمی ہے کہ وہ متحدہ عرب امارات کا جاری کردہ ڈرائیونگ لائسنس رکھیں۔
پولیس کے مطابق بغیر لائسنس ڈرائیونگ ایک سنگین خلاف ورزی ہے جو جانوں کے ضیاع کا سبب بن سکتی ہے۔ قانون کے مطابق ڈرائیورز کے پاس ان کی گاڑی کی قسم کے مطابق درست لائسنس ہونا ضروری ہے، خواہ وہ کار ہو، موٹر سائیکل یا ہیوی ٹرک۔
متحدہ عرب امارات کے نئے ٹریفک قانون (فیڈرل ڈیکری لا نمبر 14 آف 2024) کے تحت، جو 29 مارچ سے نافذ العمل ہے، بغیر درست لائسنس گاڑی چلانے یا غلط کیٹیگری کے لائسنس کے ساتھ ڈرائیونگ کرنے والے افراد کو 1 لاکھ درہم تک جرمانے کا سامنا کرنا پڑ سکتا ہے۔
