خلیج اردو
ابوظہبی، 27 اکتوبر 2025: متحدہ عرب امارات کی کابینہ نے مالی سال 2026 کے لیے وفاقی بجٹ کی منظوری دے دی ہے جس میں متوقع آمدن 92.4 ارب درہم اور اخراجات بھی اسی کے مساوی رکھے گئے ہیں۔ نائب صدر، وزیر اعظم اور دبئی کے حکمران شیخ محمد بن راشد المکتوم نے اعلان کیا کہ 2026 کا یہ وفاقی بجٹ وفاق کے قیام کے بعد سے سب سے بڑا بجٹ ہے۔
کابینہ نے اجلاس کے دوران معیشت اور بین الاقوامی تعاون کے شعبوں میں 35 بین الاقوامی معاہدوں اور مفاہمتی یادداشتوں کی بھی منظوری دی۔ شیخ محمد بن راشد نے کہا کہ "ہمارے بجٹ متوازن ہیں، سرمایہ کاری میں اضافہ ہو رہا ہے، غیر ملکی تجارت تیزی سے بڑھ رہی ہے اور معیشت ترقی کر رہی ہے۔” انہوں نے مزید کہا کہ متحدہ عرب امارات عرب دنیا میں پہلا اور براہ راست غیر ملکی سرمایہ کاری برآمد کرنے والی دنیا کی سرفہرست 20 معیشتوں میں شامل ہے۔
اعداد و شمار کے مطابق، 2024 میں امارات کی غیر ملکی سرمایہ کاری ایک ٹریلین پچاس ملین درہم تک پہنچ گئی، جو پچھلے سال کے مقابلے میں 9 فیصد اضافہ ظاہر کرتی ہے۔ 2019 سے 2024 کے درمیان متحدہ عرب امارات کی برآمدات میں 103 فیصد اضافہ ریکارڈ کیا گیا، جو تقریباً 470 ارب درہم سے بڑھ کر 950 ارب درہم تک جا پہنچی۔
