خلیج اردو
امریکی فوج نے ایران کی ایک بندرگاہ کی جانب جانے والے ایک ٹینکر کو ناکارہ بنا دیا، جبکہ ایران کے خلاف حالیہ امریکی فضائی حملوں کا سلسلہ بھی جاری ہے۔
امریکی حکام کے مطابق حالیہ حملوں کا مقصد آبنائے ہرمز کو کھولنے کے ساتھ ساتھ ایران کی ان عسکری صلاحیتوں کو بھی نشانہ بنانا ہے، جنہیں مستقبل میں ممکنہ بڑے فوجی آپریشن سے قبل ختم کرنا ضروری سمجھا جا رہا ہے۔
تین امریکی حکام نے نام ظاہر نہ کرنے کی شرط پر بتایا کہ ان حملوں کے ذریعے امریکہ ایران کی دفاعی اور عسکری صلاحیتوں کو کمزور کر رہا ہے، تاکہ ضرورت پڑنے پر مزید پیچیدہ فوجی کارروائیوں کے لیے بہتر آپشنز دستیاب ہوں۔
حکام کے مطابق ان کارروائیوں سے امریکی صدر ڈونلڈ ٹرمپ کے پاس آئندہ اقدامات کے حوالے سے مزید فوجی اختیارات اور آپشنز موجود ہوں گے۔
امریکی صدر ڈونلڈ ٹرمپ گزشتہ ہفتے کانگریس کو ایران کے خلاف فوجی کارروائیوں کے باضابطہ دوبارہ آغاز سے متعلق آگاہ کر چکے ہیں، تاہم انہوں نے مستقبل کی حکمت عملی کے بارے میں کوئی واضح اشارہ نہیں دیا۔
