خلیج اردو
دبئی: تیونس کی 12 سالہ جڑواں بہنوں بیسان اور بلسان کوکا نے رواں سال کا عرب ریڈنگ چیلنج جیت کر تاریخ رقم کر دی۔ دونوں بہنوں نے 3 کروڑ 20 لاکھ سے زائد طلبہ میں سے پہلا مقام حاصل کیا اور انہیں 5 لاکھ درہم کا انعام دیا گیا۔
انعامی تقریب دبئی ورلڈ ٹریڈ سینٹر میں 23 اکتوبر کو منعقد ہوئی، جہاں متحدہ عرب امارات کے نائب صدر، وزیر اعظم اور دبئی کے حکمران شیخ محمد بن راشد المکتوم نے بیسان اور بلسان کو اعزاز سے نوازا۔ دونوں بہنوں نے مجموعی طور پر 600 سے زیادہ کتابیں مطالعہ کیں۔
عرب ریڈنگ چیلنج کے نویں ایڈیشن میں 50 ممالک کے 3 کروڑ 20 لاکھ سے زائد طلبہ نے حصہ لیا، جن کا تعلق 1 لاکھ 32 ہزار سے زیادہ اسکولوں سے تھا۔ مجموعی انعامی رقم 1 کروڑ 10 لاکھ درہم تھی، جو اسے دنیا کا سب سے بڑا علمی اور فکری مقابلہ بناتی ہے۔
بیسان کو عود بجانے کا شوق ہے اور وہ مستقبل میں ڈاکٹر بننا چاہتی ہیں، جب کہ بلسان وائلن بجاتی ہیں اور روبوٹکس انجینئر بننے کا خواب رکھتی ہیں۔
بحرین کے 11 سالہ محمد جاسم ابراہیم نے دوسرا مقام حاصل کیا اور 1 لاکھ درہم کا انعام جیتا۔ محمد نے اب تک 200 سے زائد کتابیں پڑھیں اور کہا کہ "بچپن سے کتاب میرا پہلا ساتھی رہی ہے۔”
موریتانیا کی 9 سالہ مریم شامیخ نے تیسرا مقام حاصل کیا اور 70 ہزار درہم کا انعام جیتا۔ مریم نے کہا کہ "میں اپنے والدین کی شکر گزار ہوں جنہوں نے میری رہنمائی کی۔ میں تمام بچوں کو ترغیب دیتی ہوں کہ زیادہ سے زیادہ مطالعہ کریں، کیونکہ پڑھائی انسان کو بہتر بناتی ہے۔”
غیر عرب ممالک میں عربی بولنے والے بچوں کے لیے "کمیونٹی چیمپئن” کا اعزاز اٹلی کے جہاد محمد مراد نے حاصل کیا اور 1 لاکھ درہم جیتے، جب کہ "پیپل آف ڈیٹرمنیشن” کیٹیگری میں عراق کی ماریہ حسن عجیل نے 2 لاکھ درہم کا انعام جیتا۔
اسکول کیٹیگری میں متحدہ عرب امارات کے "عطیہ بنت زید اسکول” اور لبنان کے "طرابلس الحدادین اسکول” نے مشترکہ طور پر بہترین اسکول کا اعزاز حاصل کیا اور 10 لاکھ درہم جیتے۔ مصر کی سحر مصباح کو بہترین سپروائزر قرار دیا گیا جنہیں 3 لاکھ درہم دیے گئے۔
محمد القرقاوی، سیکریٹری جنرل محمد بن راشد المکتوم گلوبل انیشی ایٹوز کے مطابق، "ہمارا مقصد آج نہیں بلکہ آئندہ سو سالوں کے لیے مطالعے کے اس جذبے کو ادارہ جاتی شکل دینا ہے۔”
انہوں نے انکشاف کیا کہ یونیسکو کے ساتھ مشترکہ تحقیق سے ظاہر ہوا کہ عرب ریڈنگ چیلنج نے عرب دنیا میں مطالعے کے رجحان کو نمایاں حد تک فروغ دیا ہے۔ اوسطاً ایک طالب علم سالانہ 8 کے بجائے اب 40 کتابیں پڑھ رہا ہے، جب کہ اسکول سے باہر مطالعے کا وقت ایک گھنٹے سے بڑھ کر چار گھنٹے ہو گیا ہے۔
مزید برآں، شیخ محمد بن راشد نے آئندہ نسلوں کے لیے اس منصوبے کے تسلسل کو یقینی بنانے کی خاطر 50 کروڑ درہم کے وقف فنڈ کے قیام کا اعلان بھی کیا۔
