خلیج اردو
دبئی میں مقیم پاکستانی خاتون ہیرا نیئر نے دبئی ڈیوٹی فری کی ملینیم ملینیئر قرعہ اندازی میں اپنی پہلی ہی ٹکٹ پر 10 لاکھ امریکی ڈالر کا انعام جیت لیا۔
38 سالہ ہیرا نیئر، جو فنانس کے شعبے سے وابستہ اور چارٹرڈ اکاؤنٹنٹ ہیں، نے بتایا کہ انہیں اس اسکیم کے بارے میں پہلی بار اپنے ایک ساتھی ملازم سے معلوم ہوا، جس کے بعد انہوں نے ویب سائٹ پر جا کر صرف ایک ٹکٹ خریدنے کا فیصلہ کیا۔
انہوں نے بتایا کہ کمپیوٹر سے جاری ہونے والا ٹکٹ نمبر 1387 ان کے چارٹرڈ اکاؤنٹنٹ رکنیت نمبر سے کافی حد تک ملتا جلتا تھا، جس کی وجہ سے انہیں اس نمبر کے بارے میں ایک مثبت احساس پیدا ہوا۔
ہیرا نیئر کے مطابق ٹکٹ خریدنے کے بعد وہ اسے تقریباً بھول چکی تھیں۔ چند روز بعد دفتر میں بیٹھے ہوئے انہوں نے سوشل میڈیا پر براہِ راست قرعہ اندازی دیکھی، جہاں جیتنے والا نمبر 1387 سن کر وہ حیران رہ گئیں۔
انہوں نے بتایا کہ سب سے پہلے اپنے شوہر کو فون کر کے خوشخبری سنائی، لیکن انہیں یقین نہیں آیا۔ شوہر نے ٹکٹ اور قرعہ اندازی کی ویڈیو دیکھنے کے بعد ہی اس خبر پر یقین کیا۔
ہیرا نیئر نے بتایا کہ ابھی تک اس کامیابی کے بارے میں ان کے شوہر کے علاوہ کسی اور کو معلوم نہیں، حتیٰ کہ اس ساتھی کو بھی نہیں جس نے انہیں اس اسکیم کے بارے میں بتایا تھا۔
انہوں نے کہا کہ اب وہ انعامی رقم سے دبئی یا پاکستان میں گھر خریدنے پر غور کر رہی ہیں۔ ان کا کہنا تھا کہ ان کی خواہش ہے کہ وہ اپنے نام پر جائیداد خریدیں کیونکہ ان کے خاندان میں خواتین کے نام پر جائیداد ہونا عام بات نہیں۔
ہیرا نیئر نے 3 جولائی کو آن لائن ٹکٹ نمبر 1387 خریدا تھا اور وہ 1999 میں اس اسکیم کے آغاز کے بعد 10 لاکھ ڈالر جیتنے والی 29ویں پاکستانی شہری بن گئی ہیں۔
اسی قرعہ اندازی میں شارجہ میں مقیم 45 سالہ بھارتی کاروباری شخصیت محمد ایوب الدین نے بھی ٹکٹ نمبر 4144 کے ذریعے 10 لاکھ امریکی ڈالر کا انعام جیتا۔ وہ گزشتہ تقریباً ایک دہائی سے اس اسکیم میں باقاعدگی سے حصہ لے رہے تھے اور اس انعام کے فاتح بننے والے 280ویں بھارتی شہری ہیں۔
