خلیج اردو
ممبئی: بھارتی سینما کی تاریخ میں رومانویت کی علامت سمجھی جانے والی فلم ’’دل والے دلہنیا لے جائیں گے‘‘ (ڈی ڈی ایل جے) کو ریلیز ہوئے 30 سال مکمل ہو گئے۔ ’’پَلَٹ…پَلَٹ‘‘ جیسے مکالمے سے شہرت پانے والی اس فلم نے نہ صرف شائقین کے دل جیتے بلکہ بالی ووڈ میں محبت کے ایک نئے دور کی بنیاد رکھی۔
1995 میں ریلیز ہونے والی یہ فلم یش راج فلمز کے بینر تلے بنی تھی اور اس نے آدتیہ چوپڑا کے بطور ہدایتکار کیریئر کا آغاز کیا۔ فلم میں شاہ رخ خان نے دلکش مگر شوخ کردار راج کا اور کاجول نے جوش و جذبے سے بھرپور سمرن کا کردار ادا کیا۔ کہانی دو این آر آئی نوجوانوں کی یورپ کی سیر کے دوران ہونے والی ملاقات اور عشق کے گرد گھومتی ہے۔
فلم نے ریلیز کے وقت تقریباً 60 کروڑ روپے کمائے تھے، جو آج کی شرحِ افراطِ زر کے مطابق 600 کروڑ بھارتی روپے سے زائد بنتے ہیں۔ دلچسپ بات یہ ہے کہ ’’ڈی ڈی ایل جے‘‘ ممبئی کے مراٹھا مندر سینما میں 25 سال تک لگاتار نمائش پذیر رہی، جو ایک عالمی ریکارڈ ہے۔
فلم کی موسیقی، مکالمے اور رومانوی مناظر آج بھی ناظرین کے دلوں میں تازہ ہیں، اور شاہ رخ خان و کاجول کی جوڑی کو اب تک بالی ووڈ کی سب سے یادگار جوڑیوں میں شمار کیا جاتا ہے۔
