خلیج اردو
دبئی: رس مالا انویسٹمنٹ ہولڈنگز (ڈی آئی ایف سی) لمیٹڈ نے اعلان کیا ہے کہ اس کے زیر انتظام پوسیڈن فنڈ نے اپنے سرمایہ کاروں کو آٹھ گنا سے زائد منافع دے کر ایک بڑا سنگ میل عبور کیا ہے۔ کمپنی کے مطابق یہ لین دین گزشتہ 24 ماہ کے دوران گروپ کے سب سے نمایاں اور بڑی مالیاتی کامیابیوں میں سے ایک ہے۔
پوسیڈن فنڈ دبئی انٹرنیشنل فنانشل سینٹر (ڈی آئی ایف سی) میں قائم ایک سرمایہ کاری فنڈ ہے، جس کا مقصد گلف نیویگیشن ہولڈنگ پی جے ایس سی کے سرمایہ میں اضافہ اور اس کی توسیعی حکمت عملیوں کی معاونت کرنا تھا۔ رس مالا انویسٹمنٹ بینک لمیٹڈ نے گلف نیویگیشن کے 59.9 ملین ڈالر مالیت کے "مینڈیٹری کنورٹیبل بانڈز” کا اجرا منظم کیا، جنہیں بعد ازاں 200 ملین عام حصص میں تبدیل کیا گیا۔ اس طرح پوسیڈن فنڈ گلف نیویگیشن کا سب سے بڑا شیئر ہولڈر بن گیا۔
فنڈ کے سرمایہ کاروں میں یو اے ای کے نمایاں خاندانی دفاتر، ہائی نیٹ ورتھ انفرادی سرمایہ کار اور مالیاتی ادارے شامل تھے۔ یہ ایگزٹ اس وقت سامنے آیا ہے جب گلف نیویگیشن 3.2 بلین درہم مالیت کے "برووج انرجی لمیٹڈ” کے حصول کے عمل میں ہے۔
رس مالا انویسٹمنٹ بینک کے ڈپٹی سی ای او علی تقی نے کہا کہ وہ اس کامیاب ایگزٹ اور سرمایہ کاروں کے منافع سے انتہائی خوش ہیں۔ ان کا کہنا تھا کہ یہ لین دین رس مالا کی اس صلاحیت کا مظہر ہے جو پیچیدہ مالیاتی ڈھانچوں کو ترتیب دے کر سرمایہ کاروں کو خصوصی سرمایہ کاری کے حل فراہم کرتی ہے۔
