کویت میں غیر ملکیوں کے لیے ویزا اور اقامہ منتقلی کا عمل آسان

کویت کی وزارتِ داخلہ نے غیر ملکی کارکنوں کے لیے ویزا کے اجرا اور اقامہ منتقلی کے عمل کو آسان بنانے کے لیے دو نئی الیکٹرانک سروسز متعارف کرا دی ہیں۔ کویت نیوز ایجنسی (کونا) کے مطابق یہ سہولیات وزارتِ داخلہ کے جنرل ڈیپارٹمنٹ آف انفارمیشن سسٹمز نے جنرل ڈیپارٹمنٹ آف ریزیڈنسی کے تعاون سے شروع کی ہیں، جو اب وزارتِ داخلہ کی سرکاری ویب سائٹ پر دستیاب ہیں۔

بیان کے مطابق نئی ای سروسز آرٹیکل 18 کے تحت سول سیکٹر میں کام کرنے والے ملازمین کے لیے اقامہ کے اجرا، تجدید اور منتقلی کو مکمل طور پر آن لائن ممکن بناتی ہیں۔ اس کے علاوہ ان سہولیات کے ذریعے کسی ملازم کے اقامے کو ورکر ریزیڈنسی سے عارضی ریزیڈنسی (آرٹیکل 14) میں منتقل کرنا بھی ممکن ہوگا، جس کے لیے بار بار دفاتر کے چکر لگانے کی ضرورت نہیں رہے گی۔

وزارتِ داخلہ کا کہنا ہے کہ اس اقدام کا مقصد انتظامی بوجھ کم کرنا، صارفین کا وقت اور محنت بچانا اور اقامہ سے متعلق معاملات کی تیز رفتار تکمیل کو یقینی بنانا ہے۔ اس کے ساتھ ساتھ ای گورنمنٹ نظام کو مزید مربوط بنانا، کارکردگی بہتر کرنا اور صارفین کے تجربے کو بہتر بنانا بھی اس منصوبے کا اہم ہدف ہے۔