خلیج اردو
واشنگٹن: سابق امریکی صدر ڈونلڈ ٹرمپ نے بھارت کو ایک اور اقتصادی دھچکا دینے کا اعلان کرتے ہوئے کہا ہے کہ وہ بھارت کے خلاف ٹیرف میں خاطر خواہ اضافہ کریں گے۔ ٹرمپ نے الزام عائد کیا کہ بھارت روس سے سستا تیل خرید کر اسے منافع کے ساتھ آگے فروخت کر رہا ہے، جبکہ بھارت کو یوکرین میں جاری انسانی المیے اور ہلاکتوں کی کوئی پرواہ نہیں۔
ٹرمپ نے کہا کہ بھارت کی غیر ذمہ دارانہ پالیسیوں اور دوغلے تجارتی رویے کے باعث امریکہ کو سخت اقتصادی اقدامات اٹھانے پڑ رہے ہیں۔ "ہم بھارت کے خلاف ٹیرف میں نمایاں اضافہ کریں گے تاکہ امریکہ کے مفادات کا تحفظ کیا جا سکے”، انہوں نے کہا۔
ٹرمپ نے بھارت پر الزام لگایا کہ وہ یوکرین میں روسی جارحیت سے فائدہ اٹھاتے ہوئے سستا تیل خرید کر اسے عالمی منڈی میں مہنگے داموں فروخت کر رہا ہے، جبکہ دوسری جانب انسانی حقوق اور بین الاقوامی اصولوں کی خلاف ورزیوں پر خاموش تماشائی بنا ہوا ہے۔
سیاسی تجزیہ کاروں کے مطابق ڈونلڈ ٹرمپ کے ان بیانات سے امریکہ اور بھارت کے تجارتی تعلقات میں کشیدگی مزید بڑھ سکتی ہے، خاص طور پر ایسے وقت میں جب امریکہ بھارت سے تجارتی توازن بہتر بنانے کی کوشش کر رہا ہے۔
