خلیج اردو
دبئی: ابوظہبی نیشنل آئل کمپنی (ایڈنک) کی معاونت سے بننے والے ایکس آر جی کنسورشیم نے آسٹریلیا کی انرجی پروڈیوسر کمپنی سینٹوس لمیٹڈ کے حصول کے لیے دی جانے والی 18.7 ارب ڈالر کی پیشکش واپس لے لی ہے، جس کے ساتھ ہی کئی ماہ سے جاری مذاکرات ختم ہوگئے۔
جون میں دی جانے والی اس پیشکش کے تحت سینٹوس کے ہر حصص کے لیے 5.761 امریکی ڈالر (8.89 آسٹریلین ڈالر) کی مکمل نقدی ادائیگی کی تجویز دی گئی تھی۔ تاہم سینٹوس کے حصص حالیہ دنوں میں 7.65 آسٹریلین ڈالر پر بند ہوئے، جو اس پیشکش کی قیمت سے کم ہیں، جس سے مارکیٹ ویلیو اور حصولی قیمت کے درمیان فرق نمایاں ہوگیا۔
سینٹوس کے بورڈ نے ایڈنک کی حمایت یافتہ اس پیشکش کی سفارش کی تھی لیکن بڑی مزدور یونینوں کی نمائندہ تنظیم "آف شور الائنس” سمیت کئی گروپس نے اس ڈیل کی مخالفت کی اور حکومت پر زور دیا کہ سینٹوس کو آسٹریلوی ملکیت میں ہی رکھا جائے۔
یہ تیسری مرتبہ ہے کہ سینٹوس کے حصول کی کوشش ناکام ہوئی ہے۔ اس پیشرفت نے جہاں ایڈنک کی بین الاقوامی توسیعی حکمت عملی کو سست کیا ہے وہیں یہ بات بھی اجاگر کی ہے کہ آسٹریلیا میں توانائی کے اثاثے خریدنے کے خواہشمند غیر ملکی سرمایہ کاروں کو کئی قسم کی ریگولیٹری اور مارکیٹ رکاوٹوں کا سامنا رہتا ہے۔
ایکس آر جی، جو مکمل طور پر ایڈنک کی ملکیت ہے، گیس، ایل این جی، کیمیکلز اور دیگر انرجی سلوشنز میں سرمایہ کاری کرتی ہے۔ کمپنی نے کہا ہے کہ وہ عالمی توانائی مارکیٹ میں نئے مواقع کے حصول کے لیے سرگرم رہے گی اور صاف توانائی کی منتقلی کے منصوبوں پر بھی کام جاری رکھے گی۔
