
خلیج اردو: اب دنیا کی دوسری بلند ترین چوٹی کے ٹو پر بھی موبائل فون کا استعمال کیا جاسکے گا کیونکہ بارڈر ایریاز میں ٹیلی کمیونیکیشن کی سہولت فراہم کرنے والے سرکاری ادارے اسپیشل کمیونیکیشن آرگنائزیشن نے چوٹی کے بیس کیمپ پر موبائل ٹاور نصب کردیا ہے۔
موبائل ٹاور کی تنصیب سے مہم جوئی کے دوران کوہ پیماؤں کو نا صرف اپنی ٹیم کے ساتھ باہمی رابطوں میں آسانی ہوگی بلکہ کسی ہنگامی صورتحال میں کوہ پیماؤں کو متعلقہ حکام کی جانب سے بروقت امداد بھی فراہم کی جا سکے گی۔ علاوہ ازیں موبائل ٹاور کی تنصیب سے کوہ پیماؤں اور سیاحوں کیلئے اپنے اہلخانہ کے ساتھ رابطہ بھی ممکن ہوگیا ہے۔
وزیر سیاحت گلگت بلتستان ناصر علی خان نے بتایا کہ ٹاور کے فعال ہونے کے بعد رواں سال موسم گرما کے دوران مہم جوئی کرنے والے کوہ پیماؤں کو تیز ترین انٹرنیٹ اور فون کال کی سہولت میسر آئے گی۔
قبل ازیں کے ٹو سر کرنے جانیوالے کوہ پیما رابطے کیلئے سیٹلائٹ فون استعمال کرتے تھے لیکن موسم خراب ہونے کی صورت میں انہیں بیس کیمپ کے ساتھ رابطے میں مشکلات کا سامنا کرنا پڑتا تھا۔