خلیج اردو
لاہور: وزیرِ اطلاعات پنجاب عظمیٰ بخاری نے کہا ہے کہ صوبے میں کسی صورت بھی ایسے ہتھیاربند جتھوں کو ریاستی رٹ چیلنج کرنے کی اجازت نہیں دی جائے گی جو بندوق اور گولی کے زور پر اپنی رائے مسلط کرنے کی کوشش کریں۔ انہوں نے واضح کیا کہ پنجاب کے امن و امان کے تحفظ کے لیے ہر ممکن قدم اٹھائے جائیں گے اور ہڑتال یا زبردستی کاروبار بند کرانے والوں کے خلاف دہشت گردی کے مقدمات درج کیے جائیں گے۔
عظمیٰ بخاری نے کہا کہ غزہ اور فلسطین کے حق میں نکلنے والوں میں کچھ افراد نے املاک کو نقصان پہنچایا، پولیس اہلکاروں پر تشدد کیا اور گاڑیاں چھینی گئیں جبکہ ثبوت مٹانے کے لیے سی سی ٹی وی کیمروں کو توڑا گیا۔ ان واقعات کی تحقیقات جاری ہیں اور ملوث افراد کے خلاف سخت کارروائی عمل میں لائی جائے گی۔
صوبائی محکمہ داخلہ کی کارروائیوں کے حوالے سے بتایا گیا کہ تحریک لبیک پاکستان کے 559 افراد جسمانی ریمانڈ پر ہیں جبکہ رضوی برادران کے خلاف بھی قانونی کارروائیاں جلد مکمل کی جائیں گی۔ وزیرِ اطلاعات نے کہا کہ کسی کو پنجاب کا امن خراب کرنے کی اجازت نہیں دی جائے گی اور قانون شکنی کرنے والوں کو قانون کے مطابق جواب دیا جائے گا۔
محکمہ داخلہ پنجاب نے 28 اسلحہ ڈیلرز کے لائسنس منسوخ کر دیے ہیں۔ صوبے میں موجود اسلحہ لائسنسوں کے اعداد و شمار کے مطابق 10 لاکھ 12 ہزار 454 افراد کے پاس فرداً فرداً اسلحہ لائسنس جاری ہیں جبکہ سکیورٹی کمپنیوں کو 37 ہزار 918 اسلحہ لائسنس دیے گئے ہیں۔ اسلحہ لائسنسز کا پورا ریکارڈ نادرا کی مدد سے آن لائن کیا جا رہا ہے تاکہ لائسنسنگ کے عمل میں شفافیت اور موثر نگرانی ممکن ہو۔
وزیرِ اطلاعات نے عوام اور متعلقہ اداروں پر زور دیا کہ وہ قانون کے دائرے میں رہ کر اپنے مطالبات پیش کریں اور کوئی بھی غیر قانونی یا تشدد آميز کارروائی برداشت نہیں کی جائے گی۔
